اسلام آباد: کینیڈا کے ہائی کمشنر طارق علی خان نے نائب وزیراعظم اور وزیر خارجہ سینیٹر محمد اسحاق ڈار سے ملاقات کی، جس میں دوطرفہ تعلقات اور باہمی تعاون کے فروغ پر تبادلہ خیال کیا گیا۔
ملاقات کے دوران کینیڈین سفیر نے علاقائی امن و استحکام کے لیے پاکستان کی سفارتی کوششوں اور سہولت کاری کے کردار کو سراہا اور اس ضمن میں کینیڈا کی جانب سے بھرپور حمایت کا یقین دلایا۔
نائب وزیراعظم اسحاق ڈار نے کہا کہ پاکستان خطے اور عالمی سطح پر پائیدار امن کے قیام کے لیے اپنی کوششیں جاری رکھنے کے لیے پرعزم ہے۔ انہوں نے دونوں ممالک کے درمیان حالیہ اعلیٰ سطح کے رابطوں پر اطمینان کا اظہار کیا۔
اس موقع پر دونوں رہنماؤں نے اس عزم کا اعادہ کیا کہ پاکستان اور کینیڈا کے درمیان تعلقات کو مختلف شعبوں میں مزید وسعت دی جائے گی۔ ملاقات کے اختتام پر سفارتی اور تجارتی روابط کو نئی بلندیوں تک لے جانے کے عزم کا اظہار بھی کیا گیا۔
