باجوڑ: خیبرپختونخوا کے قبائلی ضلع باجوڑ میں اُس وقت خوف و ہراس پھیل گیا جب نام نہاد فتنہ الخوارج نے ایک کرکٹ گراؤنڈ کو نشانہ بناتے ہوئے کواڈ کاپٹر کے ذریعے حملہ کردیا، جس کے نتیجے میں کم از کم 3 افراد زخمی ہوگئے۔
سکیورٹی ذرائع کے مطابق یہ حملہ باجوڑ کے حساس علاقے ماموند میں اس وقت کیا گیا جب مقامی نوجوان کرکٹ کھیلنے میں مصروف تھے۔ عینی شاہدین کا کہنا ہے کہ اچانک فضا میں ایک کواڈ کاپٹر نمودار ہوا اور چند لمحوں بعد گراؤنڈ کے قریب دھماکہ ہوا، جس سے کھلاڑیوں اور تماشائیوں میں بھگدڑ مچ گئی۔
ذرائع کے مطابق اس حملے میں 3 افراد زخمی ہوئے جنہیں فوری طور پر قریبی طبی مراکز منتقل کیا گیا، جہاں انہیں طبی امداد فراہم کی جا رہی ہے۔ زخمیوں کی حالت خطرے سے باہر بتائی جا رہی ہے تاہم علاقے میں شدید خوف پایا جاتا ہے۔
مقامی افراد کا کہنا ہے کہ کھیل کے میدان کو نشانہ بنانا نہ صرف بزدلانہ کارروائی ہے بلکہ اس سے نوجوانوں کی سرگرمیوں کو بھی متاثر کرنے کی کوشش کی جا رہی ہے۔ عوام نے سکیورٹی اداروں سے مطالبہ کیا ہے کہ ایسے عناصر کے خلاف سخت کارروائی کی جائے۔
ڈپٹی کمشنر باجوڑ نے اس واقعے پر ردعمل دیتے ہوئے کہا کہ گزشتہ دو ماہ کے دوران ماموند اور سلارزئی کے علاقوں میں بھی مارٹر گولوں کے حملے کیے گئے تھے، جن میں افغان سرحد پار سے فائرنگ کے واقعات بھی شامل ہیں۔ ان حملوں کے نتیجے میں 3 خواتین اور 6 بچے شہید ہوئے تھے، جس نے علاقے میں پہلے ہی تشویش کی فضا پیدا کر رکھی تھی۔
سکیورٹی ذرائع کا کہنا ہے کہ فورسز اس قسم کی دہشتگرد کارروائیوں کا بھرپور جواب دے رہی ہیں اور علاقے میں سرچ آپریشنز بھی جاری ہیں تاکہ ملوث عناصر کو گرفتار کیا جا سکے اور مستقبل میں ایسے واقعات کا سدباب کیا جا سکے۔
باجوڑ کے عوام نے اس واقعے کے بعد شدید غم و غصے کا اظہار کرتے ہوئے مطالبہ کیا ہے کہ امن و امان کو یقینی بنانے کے لیے فوری اور مؤثر اقدامات کیے جائیں تاکہ کھیل کے میدان دوبارہ محفوظ بن سکیں اور نوجوان بلا خوف اپنی سرگرمیاں جاری رکھ سکیں۔
