وزیراعظم شہباز شریف نے پاکستان اور چین کے درمیان برادرانہ تعلقات کو مزید مضبوط بنانے کے لیے پاکستانی اور چینی کمپنیوں کے درمیان بزنس ٹو بزنس تعاون کی اہمیت پر زور دیا ہے۔
انہوں نے یہ بات آج ہانگژو میں چین کی معروف کمپنیوں کے اعلیٰ عہدیداروں سے ملاقاتوں کے دوران کہی۔
چین کے کارپوریٹ شعبے سے روابط کے سلسلے میں وزیراعظم نے Sheng Huo Neng Yuan Ke Ji Company، CATL، StarCharge اور Xiuzheng Pharmaceutical Group کے نمائندوں سے ملاقاتیں کیں۔
وزیراعظم نے Sheng Huo Neng Yuan Ke Ji Company کی سی ای او ایگنس سیو سے بھی ملاقات کی، جس میں قابلِ تجدید توانائی کے شعبے میں تعاون پر تبادلہ خیال کیا گیا۔
انہوں نے پاکستان میں قابلِ تجدید توانائی کی بڑھتی ہوئی مارکیٹ اور اس کی طلب کو اجاگر کرتے ہوئے کہا کہ حکومت نے خصوصاً شمسی توانائی کے شعبے کے فروغ کے لیے مختلف پالیسی اقدامات کیے ہیں۔
وزیراعظم نے CATL کے ایگزیکٹو صدر آسکر لو سے بھی ملاقات کی، جس میں جدید بیٹریوں، توانائی ذخیرہ کرنے کے نظام اور شمسی توانائی سے منسلک حلوں کے ذریعے پاکستان کی صاف توانائی کی جانب منتقلی میں تعاون پر گفتگو ہوئی۔
StarCharge Group کی چیئرپرسن ڈین وے شاؤ سے ملاقات میں الیکٹرک گاڑیوں کے چارجنگ انفراسٹرکچر اور اسمارٹ موبیلیٹی سسٹمز پر تبادلہ خیال کیا گیا۔
Xiuzheng Pharmaceutical Group کے صدر سن یوآن نے بھی وزیراعظم سے ملاقات کی، جس میں دوا سازی، صحت کے شعبے میں تعاون اور پاکستان کے بڑھتے ہوئے طبی شعبے میں سرمایہ کاری کے مواقع زیر غور آئے۔
ملاقاتوں میں پاکستان میں سرمایہ کاری بڑھانے، مینوفیکچرنگ سہولیات قائم کرنے اور موجودہ کاروباری سرگرمیوں کو وسعت دینے کے امکانات پر بھی بات چیت کی گئی۔
وزیراعظم نے پاکستان میں کاروبار کرنے میں آسانی کے لیے حکومتی پالیسیوں اور سرمایہ کاری کے فروغ کے لیے اٹھائے گئے اقدامات پر بھی روشنی ڈالی۔
