محکمہ صحت نے ایمبولینس کی تعداد بڑھانے کا اعلان کیا تھا اس پر عملدرآمد نہیں کیا گیا، ذرائع
کراچی (اسٹاف رپورٹر) سندھ ریسکیو اینڈ میڈیکل سروسز سابق امن ایمبولینس نے محکمہ صحت سندھ کی جانب سے فنڈز کی عدم فراہمی پر کراچی بھر میں اپنی سروس بند کر دی ہے جبکہ محکمہ صحت نے ان ایمبولینس کی تعداد بڑھانے کا بھی اعلان کیا تھا، اس پر بھی عملدرآمد نہیں کیا گیا۔ تفصیلات کے مطابق گزشتہ سال جون میں حکومت سندھ نے امن ہیلتھ کیئر سروسز کے ساتھ پبلک پرائیویٹ پارٹنر شپ کے تحت شہریوں کے لیے سندھ ریسکیو اینڈ میڈیکل سروسز متعارف کروائی، صوبائی حکومت نے ایمبولینس سروسز کو 412 ملین روپے کی رقم فنڈز کی مد میں فراہم کرنا تھی اور امن ہیلتھ کیئر سروسز نے بین الاقوامی معیارات کے مطابق ہنگامی طبی امداد کی سہولتوں پر مشتمل ایمبولینس چلانے کا نظام فعال رکھنا تھا۔ ذرائع کا کہنا ہے کہ سندھ ریسکیو اینڈ میڈیکل سروسز کی انتظامیہ محکمہ صحت سے رابطے میں ہے اور انہیں جلد فنڈز جاری کرنے کی یقین دہانی کرائی گئی ہے تاہم فنڈز ملنے تک ایمبولینس سروس نہیں چلا سکتے۔