لاس اینجلس (انٹرنیشنل ڈیسک) امریکا میں 2020ء میں ہونے والے صدارتی انتخابات کے حوالے سے ڈیموکریٹک پارٹی کے امیدواروں کا آخری مباحثہ ریاست کیلی فورنیا کے شہر لاس اینجلس میں ہوا،جس میں 7امیدواروں نے شرکت کی۔ 3 گھنٹے تک جاری رہنے والے مباحثے کا اہتمام پی بی ایس اور جریدے پولیٹیکو نے کیا،جس کے 4میزبانوں میں پاکستانی نژاد آمنہ نواز بھی شامل تھیں۔ مباحثے کے پہلے دور میں 20امیدواروں نے شرکت کی تھی، تاہم اب یہ تعداد کم ہوتے ہوئے 7رہ گئی ہے۔ حال ہی میں بھارتی نژاد کملا ہیرس نے مقابلے سے دستبردار ہونے کا اعلان کیا ہے۔ مباحثے کے دوران امیدواروں نے متفقہ طور پر صدر ٹرمپ کو ملکی تاریخ کا بدعنوان ترین شخص قرار دیا۔