ـ11ویں اوپن گالف چیمپئن شپ آج سے ڈی ایچ اے کنٹری اینڈ گالف کلب میں شروع ہوگی

کراچی (اسٹاف رپورٹر) 11ویں ڈی ایچ اے کراچی کپ آل پاکستان اوپن گالف چیمپئن شپ ڈی ایچ اے کنٹری اینڈ گالف کلب میں آج سے شروع ہوگی۔ فائنل اور تقریب تقسیم انعامات کا 2فروری کو ہوگا۔ اس بات کا اعلان ٹورنامنٹ کمیٹی نے ایک پریس کانفرنس میں کیا۔ ٹورنامنٹ پاکستان گالف فیڈریشن اور سندھ گالف فیڈریشن سے منظور شدہ ہے۔ ایونٹ میں 250گالفرز شرکت کریں گے۔ ٹورنامنٹ میں مختلف کیٹیگریز جس میں پروفیشنل ، سینئر پروفیشنل، امیچور، خواتین اور جونئیرز شامل ہیں ۔ کمیٹی نے بتایا کہ اس سال جیتنے والوں کے لیے 33لاکھ انعامی رقم رکھی گئی ہے۔ 3روزہ ٹورنامنٹ 54ہول کی بنیاد پر کھیلا جائے گا۔ واضح رہے گزشتہ سال جیتنے والے مطلوب احمد اور تیمور خان ٹورنامنٹ میں اپنے اعزاز کا دفاع کرینگے۔ منتظمین کا کہنا تھا کہ سب سے نمایاں بات ٹویاٹا ایزون کار ہے جو ہول ان ون کی بنیاد پر دی جائے گی جس کو ٹویوٹا سینٹرل موٹر ز نے اسپانسر کیا ہے۔