ملک بھر میں عطیات کی نگرانی کیلئے چیریٹیز رجسٹریشن اتھارٹی قائم کرنے کا فیصلہ ٗ مکمل تفصیلات فراہم کرنا ہونگی ٗ رجسٹریشن کی مدت ایک سال ہوگی
خلاف ورزی کرنیوالوں کیخلاف انسداد دہشت گردی ٗ انسداد منی لانڈرنگ سمیت دیگر قوانین کے تحت کارروائی ہوسکے گی ٗ ذرائع
اسلام آباد (مانیٹرنگ ڈیسک) وفاقی حکومت نے خیراتی اداروں کی جانب سے عطیات کی وصولی کے عمل کی نگرانی کے لیے جامع قانون سازی سے نگران اتھارٹی بنانے کا فیصلہ کرلیا۔ مجوزہ بل کے مطابق ملک بھر میں عطیات کی نگرانی کے لیے چیریٹیز رجسٹریشن اتھارٹی قائم کی جائے گی جو عطیات وصولی کے عمل کو رجسٹر، ریگولیٹ، مانیٹر اور کنٹرول کرے گی۔ عطیات اکٹھا کرنے والوں کو اتھارٹی کو مکمل تفصیلات فراہم کرنا ہوں گی۔ ذرائع کے مطابق مجوزہ بل کے تحت عطیات وصولی کے مقاصد واضح کرنا ضروری ہوگا۔ حکومت، عدلیہ، فورسز، پارلیمنٹ کسی بیرونی حکومت، ادارے یا کالعدم تنظیموں کا نام استعمال نہیں کیا جاسکے گا۔ مجوزہ بل کے مطابق عطیات وصولی کی رجسٹریشن کی مدت ایک سال ہوگی اور اس کے بعد اس میں توسیع لینا ہوگی۔ عطیات کا ریکارڈ مرتب کرنا ضروری ہوگا۔ خلاف ورزی کرنے والوں کے خلاف انسداد دہشت گردی، انسداد منی لانڈرنگ سمیت دیگر قوانین کے تحت کارروائی ہو سکے گی۔
خیراتی اداروں کے عطیات وصولی کی نگرانی کیلئے شکنجہ تیار
القمر