مظفرآباد: وزیراعظم آزاد کشمیرراجا فاروق حیدر کا کہنا ہے کہ بھارت کشمیریت کو ختم کرنے کے درپے ہے۔
یوم الحاق پاکستان پروزیراعظم آزاد کشمیرراجا فاروق حیدر نے اپنے پیغام میں کہا ہے کہ مقبوضہ کشمیرمیں تحریک آزادی کی بنیاد 19جولائی کی قرارداد الحاق پاکستان ہے، اور قرارداد الحاق پاکستان کے پیچھے کشمیری عوام کی منشا تھی۔
انہوں نے کہا کہ قرارداد الحاق پاکستان کے تناظر میں تحریک آزادی کا آغاز ہوا، قرارداد کسی جماعت کااجتماع نہیں،کشمیری عوام کی خواہش تھی، قرارداد الحاق پاکستان نے ہی کشمیریوں کیلئے راستہ متعین کیا۔
راجا فاروق حیدر نے کہا کہ ریاست جموں وکشمیر ایک اکائی ہے جبکہ بھارت کشمیریت کو ختم کرنے کے درپے ہے، بھارت نے کشمیریوں سے حق خودارادیت کا جو وعدہ کر رکھا ہے وہ اسے پورا کرے، بھارت غربت کےخاتمے پرتوجہ دے وہ دفاع پر کثیر سرمایہ خرچ کررہا ہے۔
وزیراعظم آزاد کشمیرراجا فاروق حیدر کا مزید کہنا تھا کہ برصغیر میں مسئلہ کشمیر حل ہونے سے امن آئے گا، مسئلہ کشمیر حل ہونے سے ہی یہ خطہ ترقی کرے گا۔