مالی سال 2022-2021 کا بجٹ عوام دوست بجٹ ہے، وزیراعظم

وزیراعظم عمران خان نے مالی سال 2022-2021 کے بجٹ کے حوالے سے کہا ہے کہ اس بجٹ سے سب خوش ہوں گے۔

واضح رہے کہ وزیراعظم کی زیر صدارت وفاقی کابینہ کا اجلاس منعقد ہوا جس کے بعد وزیر اعظم بجٹ تقریر کے لیے قومی اسمبلی میں تشریف لائے۔

اجلاس میں شرکت کے لیے جاتے ہوئے قومی اسمبلی کی راہداری میں وزیراعظم عمران خان سے سوال کیا گیا کہ کیا آج عوام دوست بجٹ ہو گا۔

اس پر وزیر اعظم نے ایوان میں جاتے ہوئے جواب دیا کہ آج سب خوش ہوں گے۔

اس سے قبل وزیراعظم کی زیر صدارت اجلاس میں وفاقی کابینہ نے آئندہ مالی سال کی بجٹ تجاویز کی منظوری دی۔

اجلاس میں فنانس ڈویژن نے وزیر اعظم عمران خان کو بجٹ سے متعلق بریفنگ دی جس پر وزیر اعظم عمران خان نے متعلقہ حکام کو نوجوان پروگرام اور فوڈ سبسڈی کے لیے خصوصی ہدایات دیں۔

وفاقی کابینہ کے خصوصی اجلاس میں بجٹ 22-2021 کی تجاویز سمیت سرکاری ملازمین کی تنخواہوں اور ریٹائرڈ ملازمین کی پینشن میں 10 فیصد اضافے کی منظوری دی گئی۔

#Budget2021 What PM Imran Khan says:

video via @AbdulqadirARY pic.twitter.com/qmFL6Z9NAe

— Imran Ghazali (@ImranGhazaliPK) June 11, 2021

آج وزیر خزانہ شوکت ترین نے قومی اسمبلی میں مالی سال 2022-2021 کا بجٹ پیش کردیا ہے۔

گزشتہ روز وفاقی وزیر خزانہ شوکت ترین نے مالی سال 21-2020 کا قومی اقتصادی سروے پیش کرتے ہوئے کہا تھا کہ اب معیشت کے استحکام کے بجائے نمو پر توجہ دینی ہے۔

شوکت ترین نے بتایا تھا کہ جب کووِڈ 19 شروع ہوا اس وقت تقریباً 5 کروڑ 60 لاکھ افراد برسرِ روزگار تھے جن کی تعداد کم ہو کر 3 کروڑ 50 لاکھ پر آگئی یعنی 2 کروڑ لوگ بے روزگار ہوگئے۔

واضح رہے کہ پاکستان تحریک انصاف (پی ٹی آئی) کی حکومت نے جون 2019 میں اپنا پہلا وفاقی بجٹ قومی اسمبلی میں پیش کیا تھا۔

اس وقت کے وزیر مملکت برائے ریونیو حماد اظہر نے مالی سال 20-2019 کے لیے 70 کھرب 22 ارب روپے سے زائد کا وفاقی بجٹ پیش کیا تھا، جس میں بجٹ خسارہ جی ڈی پی کا 3151.2 ارب روپے اور 7.2 فیصد تجویز کیا گیا تھا۔

منبع: ڈان نیوز