صدر پاکستان کا جی ایچ کیو کا دورہ، آرمی چیف سے ملاقات اور سیکیورٹی صورتحال پر تبادلہ خیال

صدرمملکت ڈاکٹر عارف علوی نے جنرل ہیڈکوارٹرز (جی ایچ کیو) کا دورہ کیا اور ملک کی اندرونی اور بیرونی سطح پر سیکیورٹی کے لیے پاک آرمی کی قربانیوں کو سراہا۔

پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق ‘صدر پاکستان ڈاکٹر عارف علوی نے جی ایچ کیو کا دورہ کیا اور چیف آف آرمی اسٹاف جنرل قمر جاوید باجوہ نے ان کا استقبال کیا’۔

جی ایچ کیو آمد پر صدر مملکت کو گاڈ آف آنر پیش کیا گیا۔

آئی ایس پی آر کا کہنا تھا کہ صدر مملکت نے یادگار شہدا پر پھول چڑھائے اور فاتحہ کی۔

بیان میں کہا گیا کہ ‘صدر ملکت اور چیف آف آرمی اسٹاف نے علاقامی صورت حال اور قومی سلامتی کے امور پر تبادلہ خیال کیا’۔

President of Pakistan Dr. @ArifAlvi visited GHQ today. Upon arrival, the President was received by Chief of Army Staff (COAS) General Qamar Javed Bajwa. President was presented Guard of Honour. President laid floral wreath at Martyrs Monument and offered fateha.#APPNews pic.twitter.com/bhngNYdkjd

— APP 🇵🇰 (@appcsocialmedia) August 25, 2021

آئی ایس پی آر نے بتایا کہ ‘صدر مملکت کو پاک فوج کی آپریشنل تیاریوں سے آگاہ کیا گیا اور کمیونیکیشن اینڈ انفارمیشن ٹیکنالوجی برانچ کی جانب سے سائبر سیکیورٹی پر بریفنگ دی گئی’۔

آئی ایس پی آر نے کہا کہ ‘صدر مملکت نے پاک آرمی کی پاکستان کی بیرونی اور اندرونی سیکیورٹی کے لیے کاوشوں اور قربانیوں کا اعتراف کیا’۔

انہوں نے ‘انفارمیشن ٹیکنالوجی کے میدان اور دیگر خدمات فراہم کرنے والے اسٹیک ہولڈرز کے ساتھ رابطے کے طریقہ کار کی بھی تعریف کی’۔

آرمی چیف جنرل قمر جاوید باجوہ نے گزشتہ ہفتے پاکستان ملیٹری اکیڈمی کی تقریب میں خطاب کرتے ہوئے کہا تھا کہ شورش پسند فورسز ہائبرڈ وار کے ذریعے معاشرے اور ریاست کو کمزور کرنے کی کوشش کر رہے ہیں۔

انہوں نے کہا تھا کہ پاک آرمی ان ریشہ دوانیوں سے بخوبی آگاہ ہے اور اس سے نمٹنے کے لیے بھرپور انداز میں تیار ہے۔

جنرل قمر جاوید باجوہ نے کہا تھا کہ ہم ٹیکنالوجی اور مکمل تندہی سے ملک کے دفاع کو یقینی بنائیں گے اور صرف مضبوط مسلح افواج ہی مادر وطن کے دفاع کی ضمانت دے سکتی ہیں۔

منبع: ڈان نیوز