تاجکستان کا دورہ کرنے والے پاکستانی وفد میں شامل تجارتی مندوبین نے پاکستان تاجکستان بزنس فورم کے موقع پر شاعری کرنے والے انڈس یونیورسٹی کے چانسلر خالد امین کی وفد میں شمولیت کی تحقیقات کا مطالبہ کردیا۔
ایکسپریس نیوز کی خبر کے مطابق پھل اور سبزیوں کے ایکسپورٹ سیکٹر کی نمائندگی کرنے والے وفد میں شامل پی ایف وی اے کے سرپرست اعلی وحید احمد نے اس صورتحال پر ٹویٹ کرتے ہوئے بے محل شاعری کی مذمت کی اور خالد امین سے لاتعلقی کا اعلان کیا۔
انہوں نے بتایا کہ شاعری کے آغاز پر وفد کے مندوبین اور میزبان بھی حیران تھے تاہم شاعری طول پکڑنے اور وزیر اعظم کو نصیحت پر مندوبین بھی پہلو بدلتے رہے اور سرکاری شخصیات بھی مضطرب دکھائی دیے تاہم وزیر اعظم نے فوری مداخلت کرکے بات چیت کو معاشی اور تجارتی روابط کی طرف موڑ دیا اور وقتی طور پر پیدا ہونے والی بے چینی ختم ہوگئی اور فورم بھرپور طریقے سے آگے بڑھا۔
پاکستان تاجکستان بزنس فورم میں پاکستانی تجارتی وفد میں شامل ایک رکن کی جانب سے موقع محل کو نظر انداز کرتے ہوئے کی جانے والی شاعری قابل مذمت ہے۔ افغانستان اور خطے کی بدلتی صورتحال اور پاکستان کے لیے پیدا ہونے والے نئے چیلنجز اور امکانات کے پیش نظراس طرح کے انتہائی اہمیت کے حامل1/3 pic.twitter.com/IV7Qf71Ozt
— Waheed Ahmed (@waheedAmed) September 17, 2021
وحید احمد نے کہا کہ وفد میں شامل تمام تجارتی مندوبین نے خالد امین کے اس طرز عمل کی مذمت کی جس کی وجہ سے تجارتی وفد کو ندامت اٹھانا پڑی، وفد میں شامل اراکین نے وزارت تجارت اور متعلقہ محکموں پر زور دیا کہ وفد میں شمولیت کے لیے اہلیت اور سیاسی وابستگی کا خاص طور پر خیال رکھا جائے۔
فورم پر اس طرح کے خیالات بے وقوفی کے سوا کچھ نہیں۔ مجھ سمیت وفد میں شامل دیگر بزنس مین موصوف شاعر خالد امین کی وفد میں شمولیت کے لیے انتخاب پر حیران و پریشان ہیں اور متعلقہ حکام سے مطالبہ کرتے ہیں کہ اہم نوعیت کے سرکاری وفد میں غیر ذمہ دار شخص کو شامل کرنے کی تحقیقات2/3
— Waheed Ahmed (@waheedAmed) September 17, 2021
انہوں نے مزید کہا کہ ایک ایسے موقع پر جب افغانستان میں تبدیلی سے پاکستان کے لیے خطے بالخصوص وسط ایشیائی ریاستوں میں نئے امکانات پیدا ہورہے ہیں اہم تجارتی فورم پر اس طرح کی حرکت کا پاکستان متحمل نہیں ہوسکتا جس سے پاکستان کی تاجر برادری کی سوچ اور طرز عمل پر سوال اٹھتے ہوں۔
