لاہور: سابق فاسٹ بولر شعیب اختر کا کہنا ہے کہ اگر نیوزی لینڈ کی ٹیم افغانستان سے میچ ہارتی ہے تو پھر بہت سے سوالات جنم لیں گے۔
“راولپنڈی ایکسپریس” نے یوٹیوب پر اپنی ایک ویڈیو میں کہا ہے کہ ٹی ٹوئنٹی ورلڈ کپ کے سیمی فائنل میں پہنچنے کے لیے بھارت کی قسمت اب نیوزی لینڈ کے ہاتھوں میں ہے، کیویز کو افغانستان کے خلاف میچ میں شکست ہوئی تو بہت سارے سوالات کھڑے ہوں گے۔
سابق فاسٹ بولر نے کہا کہ مجھے خطرہ ہے کہ یہ ایک اور موضوع بحث نہ بن جائے کیونکہ میں کسی تنازع کا شکار نہیں ہونا چاہتا مگر نیوزی لینڈ کے حوالے سے پاکستانیوں کے جذبات کافی بلند ہیں، میں سمجھتا ہوں کہ کیوی ٹیم افغانستان سے بہت بہتر ہے، اگر وہ اچھے نہیں کھیلے اور ہار گئے تو پھر مسئلہ کھڑا ہوجائے گا۔
خیال رہے کہ آج نیوزی لینڈ اور افغانستان کے درمیان فیصلہ کن میچ ہے۔ اگر نیوزی لینڈ کو شکست ہوئی تو بھارت سیمی فائنل میں پہنچنے کے اہل ہو جائے گا۔
