پولی کلینک اسپتال اسلام آباد میں لاکھوں روپے کی زائد المیعاد ٹیسٹنگ کٹس خریدے جانے کا انکشاف ہوا ہے۔تفصیلات کے مطابق پولی کلینک اسپتال میں زائد المیعاد ٹیسٹ کٹس نکلنے کے معاملے پر اسپتال انتظامیہ نے کٹس کی خریداری کی تحقیقات کیلئے انکوائری کمیٹی تشکیل دیدی ہے۔ذرائع کے مطابق کمیٹی کی سربراہی ایچ او ڈی ماہر امراض اطفال ڈاکٹر شہزاد منیر کریں گے،یہ کمیٹی دو ہفتوں میں ذمہ داران کا تعین کر کے رپورٹ جمع کرائے گی۔ذرائع نے بتایا ہے کہ زائد المیعاد کٹس کی مالیت 80 لاکھ روپے ہے۔ ڈینگی کے لئے آنے والی کٹس زائد المیعاد نکلنے پر انکی ایکسپائری ڈیٹ کو ختم کر کے ایک اسٹکر نئی ڈیٹ کا لگا دیا گیا تھا۔ذرائع کا مزید کہنا ہے کہ لاکھوں روپے کی کٹس کی خریداری کی گئی. اسسٹنٹ ایگزیکٹو ڈائریکٹر میڈیکل اسٹورز اور ڈپٹی ایگزیکٹو ڈائریکٹر فنانس کی مبینہ ملی بھگت ہے۔