ہنگری میں اپوزیشن کی جانب سے سویڈن کی نیٹو میں شرکت کی منظوری کے لیے شروع کردہ خصوصی پارلیمانی اجلاس میں کورم پورا نہ ہو سکنے کی وجہ سے رائے دہی نہیں ہو سکی۔
مقامی میڈیا رپورٹس کے مطابق، اپوزیشن پارٹی کے ممبران اسمبلی کی جانب سے سویڈن کے نیٹو کے ساتھ الحاق کی منظوری کے لیے منعقدہ ہنگامی پارلیمانی اجلاس کے خلاف احتجاجی طور پر حکمران جماعت کے اراکین نے اجلاس میں شرکت نہیں کی۔
نیٹو میں سویڈن کی شمولیت کی منظوری پر رائے دہی پارلیمنٹ میں دو تہائی اکثریت رکھنے والی حکمران جماعت کے ارکان کے اجلاس میں نہ آنے کے بعد ملتوی کر دی گئی۔
ہنگری کے وزیر برائے امور خارجہ اور تجارت پیٹر سیجارتو نے 11 جولائی کو کہا تھا کہ سویڈن کی جانب سے نیٹو کی رکنیت کی منظوری فی الحال "صرف ایک تکنیکی معاملہ” ہے۔
ہنگری نے 28 جون کو اعلان کیا تھا کہ سویڈن کی نیٹو کی رکنیت کے لیے توثیق کا اجلاس موسم خزاں تک ملتوی کر دیا گیا ہے۔
فن لینڈ 4 اپریل کو نیٹو کا 31 واں رکن بنا تھاجب کہ ترکیہ اور ہنگری نے ابھی تک سویڈن کی نیٹو کی رکنیت کی منظوری نہیں دی ۔
ہنگری کے وزیر سیجارتو نے 5 جولائی کو اپنے بیان میں کہا تھا کہ وہ انقرہ کے ساتھ مسلسل رابطے میں رہیں گے اور اس بات پر زور دیا کہ اگر اتحاد میں سویڈن کی رکنیت کے حوالے سے ترکیہ کے مؤقف میں تبدیلی آتی ہے تو ہنگری کسی بھی ملک کو نیٹو میں شمولیت سے نہیں روکے گا۔