رومانیہ کے صدر کلاوس ورنر یوہانیس نے کہا ہے کہ دریائے دینیوب کی بندرگاہوں پر روسی حملے ایک جنگی جرم ہیں۔
یوہانس نے سوشل میڈیا سے جاری کردہ بیان میں دینیوب کی بندرگاہوں پر روسی حملوں کی مذّمت کی اور انہیں ناقابل قبول قرار دیا ہے۔
انہوں نے کہا ہے کہ بندرگاہوں میں یوکرینی اناج کے ڈپووں پر کئے گئے ان حملوں نے اناج کی ترسیلی صلاحیت کو متاثر کیا ہے۔
واضح رہے کہ یوکرین کے وزیر برائے انفراسٹرکچر الیگزینڈر کبراکوف نے روس کی طرف سے کل رات کے وقت دریائے دینیوب سے منسلک بندرگاہوں پر حملوں کا اعلان کیا تھا۔
کبراکوف نے جاری کردہ بیان کے ساتھ حملوں کا نشانہ بننے والی بندرگاہوں کی تصاویر بھی شیئر کی تھیں۔
انہوں نے کہا ہے کہ ” کل رات روس نے ایرانی ساختہ ڈرون طیاروں کے ساتھ بندرگاہوں پر حملے کئے اور اناج کے ڈپووں کو نشانہ بنایا ہے۔ حملوں میں افریقی ممالک، چین اور اسرائیل کے لئے روانگی کی منتظر تقریباً 40 ہزار ٹن پر مشتمل اناج کی کھیپ کو نقصان پہنچا ہے۔