اقوام متحدہ کی سلامتی کونسل نے لبنان میں پیجر دھماکوں کو انسانی حقوق کے عالمی قوانین کی سنگین خلاف ورزی قرار دیتے ہوئے اس واقعے کی مذمت کی ہے۔ اجلاس میں اس بات پر زور دیا گیا کہ بے ضرر مواصلاتی آلات کا غلط استعمال عالمی انسانی حقوق کے اصولوں کے خلاف ہے۔
اقوام متحدہ کے ہائی کمشنر برائے انسانی حقوق وولکر ترک نے اسرائیل کے لبنان پر حملے کو ممکنہ جنگی جرم قرار دیتے ہوئے کہا کہ شہریوں میں خوف و ہراس پھیلانے کے لیے تشدد کا استعمال کسی طور قابل قبول نہیں۔ انہوں نے مزید کہا کہ عالمی قوانین کسی بھی بے ضرر ڈیوائس کو نقصان پہنچانے کے لیے استعمال کرنے کی سختی سے ممانعت کرتے ہیں۔
اجلاس کے دوران لبنان کے وزیر خارجہ نے کہا کہ مواصلاتی آلات کے ذریعے حملے کے بعد دنیا میں کوئی بھی محفوظ نہیں رہا۔ انہوں نے مزید کہا کہ ہم انتقام نہیں، بلکہ انصاف چاہتے ہیں۔
واضح رہے کہ چند دن قبل لبنان میں حزب اللہ کے اراکین اور دیگر شہریوں کے زیر استعمال پیجر دھماکوں سے پھٹ گئے تھے، جس کے نتیجے میں درجنوں افراد جان کی بازی ہار گئے اور چار سے زائد افراد زخمی ہوئے۔ حزب اللہ نے ان دھماکوں کا الزام اسرائیل پر عائد کیا تھا۔