تہران: ایران کے صوبہ خراسان کے ضلع تباص میں کوئلے کی کان میں ہونے والے دھماکے سے 51 کان کن جاں بحق جبکہ متعدد زخمی ہو گئے۔
غیر ملکی خبر ایجنسی کی رپورٹ کے مطابق کوئلے کی کان میں دھماکے کا واقعہ دارالحکومت تہران سے 540 کلو میٹر دور صوبہ خراسان کے ضلع تباص میں پیش آیا۔
دھماکا دارالحکومت تہران سے 540 کلومیٹر دور واقع کان میں ہفتے کی رات 9 بجے میتھین گیس کے پھٹنے سے پیش آیا۔ دھماکا کان کے دو بلاکس میں ہوا، جس کے نتیجے میں 51 افراد کی ہلاکت اور 17 زخمی ہونے کی تصدیق ہو چکی ہے۔
رپورٹ کے مطابق، دھماکے کے وقت کان کے ان بلاکس میں 70 کان کن موجود تھے، جن میں سے کچھ افراد اب تک لاپتہ ہیں۔