اسلام آباد:مسلم لیگ ن کے رہنما سینیٹر مشاہد حسین سید کاکہنا ہے کہ لبنان کی مزاحتمی تنظیم حزب اللہ کے سربراہ سید حسن نصراللہ کی شہادت کے بعد مغرب اور بالخصوص امریکا کی منافقت کھل کر سامنے آگئی ہے، اب مغرب اور مسلمانوں کے درمیان خلیج بڑھ گئی ہے۔
میڈیا سے گفتگو کرتے ہوئے ن لیگی رہنما نے کہا کہ سید حسن نصراللہ کی شہادت 50 سال میں امت مسلمہ کا سب سے بڑا سانحہ ہے، شاہ فیصل کی شہادت کے بعد شہید حسن نصراللہ کا سانحہ مسلمہ امہ کے لیے بہت بڑا ہے۔
انہوں نے مزید کہا کہ حسن نصراللہ واحد عرب لیڈر تھے جنھوں نے اسرائیل کو فوجی شکست دی، حماس کے سابق سربراہ اسماعیل ہنیہ کی شہادت کے بعد ایران کو جنگ بندی کے نام پر دھوکا دیا گیا اور اس سانحہ سے ایران کی جوہری ہتھیار بنانے کی کوششوں میں اضافہ ہوگا۔