مکہ مکرمہ: حرمین شریفین کی انتظامیہ نے بیت اللہ شریف کی تزئین و آرائش کے سلسلے میں جدید ٹیکنالوجی کے استعمال سے نئے اقدامات شروع کیے ہیں۔
خبر رساں اداروں کے مطابق حرمین انتظامیہ نے بیان میں بتایا ہے کہ اس منصوبے میں جدید ترین ٹیکنالوجی کا استعمال کیا جا رہا ہے جس کا بنیادی مقصد خانہ کعبہ کے بیرونی اور اندرونی حصوں کی دیواروں کو مضبوط بنانا ہے تاکہ وقت کے اثرات سے محفوظ رکھا جا سکے۔
اس انتہائی نازک اور ذمہ دارانہ کام کی انجام دہی کے لیے ماہر اور تجربہ کار کاریگروں کی خدمات حاصل کی گئی ہیں۔ یہ تمام افراد نہایت عقیدت اور احتیاط کے ساتھ اپنے فرائض سرانجام دے رہے ہیں تاکہ کام کے دوران تقدس برقرار رہے۔
حکام کا کہنا ہے کہ یہ اقدامات خانہ کعبہ کے تقدس کو ہر قیمت پر برقرار رکھنے کے لیے کیے جا رہے ہیں۔ ان کا مقصد یہ ہے کہ دنیا بھر سے آنے والے لاکھوں زائرین کو ایک پرسکون اور محفوظ ماحول فراہم کیا جائے تاکہ وہ عبادت کرسکیں۔
انتظامیہ نے مزید بتایا ہے کہ بیت اللہ کی تزئین و آرائش کا یہ سلسلہ آئندہ چند روز میں مکمل کر لیا جائے گا۔ کام کی تکمیل کے بعد مسجد الحرام میں آنے والے زائرین کو ایک بار پھر پہلے سے زیادہ روحانی اور پرسکون ماحول میسر آئے گا۔
یہ بات قابل ذکر ہے کہ حرمین شریفین کی انتظامیہ ہر سال زائرین کی سہولت اور مقدس مقامات کی دیکھ بھال کے لیے ایسے جدید اور فنی اقدامات کرتی رہتی ہے۔ ان کوششوں کا مقصد مسجد الحرام میں عبادت کرنے والے کروڑوں فرزندانِ توحید کو بہترین سہولیات فراہم کرنا ہے۔
سعودی حکام کی جانب سے کیے جانے والے یہ انتظامات عالمی سطح پر زائرین کے دلوں میں خوشی کا باعث بن رہے ہیں۔ بیت اللہ شریف کی دیکھ بھال اور اس کی حفاظت کے لیے اٹھائے گئے یہ اقدامات سعودی حکومت کی مذہبی خدمات کے عزم کا منہ بولتا ثبوت ہیں۔