امریکی وزیر خارجہ اور سی آئی اے کیوبا میں بغاوت کیلئے عوام کو سر عام اکسانے لگے

واشنگٹن: امریکی وزیر خارجہ مارکو روبیو اور امریکی مرکزی انٹیلی جنس ایجنسی (سی آئی اے) نے کیوبا میں سیاسی تبدیلی کے خواہش مند شہریوں کو خفیہ تعاون کی دعوت دے دی، جبکہ امریکی صدر ڈونلڈ ٹرمپ نے بھی کیوبا کے حوالے سے ممکنہ اقدامات کا عندیہ دیا ہے۔

خبر رساں ادارے رائٹرز کے مطابق مارکو روبیو نے سوشل میڈیا پر اپنے پیغام میں کیوبا کے ان شہریوں کو مخاطب کیا جو ملک میں تبدیلی چاہتے ہیں۔ انہوں نے کیوبا کی حکومت پر بدعنوانی، وعدے پورے نہ کرنے اور چند افراد کو مراعات حاصل ہونے کے الزامات عائد کرتے ہوئے شہریوں کو سی آئی اے کے ساتھ خفیہ رابطے کے ذریعے تبدیلی کے لیے کردار ادا کرنے کی دعوت دی۔

روبیو کے پیغام کے بعد سی آئی اے نے ہسپانوی زبان میں ایک ویڈیو جاری کی، جس میں ایجنسی سے محفوظ طریقے سے رابطہ کرنے کے طریقے بیان کیے گئے۔ ویڈیو میں محفوظ انٹرنیٹ کنکشن، وی پی این اور نجی براؤزر سمیت مختلف حفاظتی اقدامات کا ذکر کیا گیا۔

دوسری جانب امریکی صدر ڈونلڈ ٹرمپ نے فلوریڈا میں ایک اجتماع سے خطاب کرتے ہوئے کہا کہ ایران سے واپسی پر امریکی بحری جہاز کیوبا کے قریب رک سکتے ہیں اور اس کے بعد مارکو روبیو کو معاہدہ مکمل کرنے کے لیے بھیجا جائے گا۔ تاہم ٹرمپ نے کسی ممکنہ معاہدے یا کارروائی کی تفصیلات نہیں بتائیں۔

کیوبا نے امریکی بیانات پر ردعمل دیتے ہوئے واشنگٹن کے اقدام کو مایوسی قرار دیا ہے۔ کیوبا کے نائب وزیر خارجہ کارلوس فرنانڈیز ڈی کوسیو نے تنقید کرتے ہوئے کہا کہ امریکہ اب سی آئی اے کے لیے عوامی سطح پر بھرتی کی کوشش کر رہا ہے۔