کابینہ میں توسیع پر ناراض نیشنل کانفرنس کے ارکانِ اسمبلی اور عمر عبداللہ کے درمیان اہم اجلاس شروع

سرینگر/ وزیرِ اعلیٰ عمر عبداللہ اور حالیہ کابینہ ردوبدل و توسیع سے ناراض نیشنل کانفرنس کے ارکانِ اسمبلی کے درمیان اہم اجلاس جلد شروع ہونے والا ہے۔ یہ اجلاس نیشنل کانفرنس کے صدر ڈاکٹر فاروق عبداللہ کی گپکار رہائش گاہ پر منعقد ہو رہا ہے۔
ذرائع نے بتایا کہ ناراض ارکانِ اسمبلی صبح ہی اجلاس کے مقام پر پہنچ گئے ہیں۔ذرائع کے مطابق، اجلاس کا مقصد ناراض ارکانِ اسمبلی کو منانا اور پارٹی کے اندر بڑھتے ہوئے اختلافات کو مزید شدت اختیار کرنے سے روکنا ہے۔
قابلِ ذکر ہے کہ نیشنل کانفرنس کی اعلیٰ قیادت نے آج صبح ناراض ارکانِ اسمبلی سے کہا تھا کہ وزیرِ اعلیٰ اور پارٹی صدر کے ساتھ ہونے والی ملاقات میں آزاد ارکانِ اسمبلی کو اپنے وفد میں شامل نہ کیا جائے۔
ذرائع کا کہنا ہے کہ ناراض ارکانِ اسمبلی کو تین آزاد ارکانِ اسمبلی کی حمایت حاصل ہے، جو کابینہ میں حالیہ ردوبدل کے معاملے پر ان کے مؤقف کی تائید کر رہے ہیں۔ ذرائع کے مطابق، تھنہ منڈی کے رکنِ اسمبلی مظفر خان اجلاس میں شرکت نہیں کر رہے ہیں۔
واضح رہے کہ ناراض ارکانِ اسمبلی حالیہ کابینہ ردوبدل و توسیع کے دوران نظرانداز کیے جانے پر ناخوش ہیں اور انہوں نے پارٹی قیادت سے اپنے تحفظات دور کرنے کا مطالبہ کیا ہے۔
اس اہم اجلاس کے نتائج سے نیشنل کانفرنس کے اندر اختلافی گروپ کے مستقبل کے لائحہ عمل کا تعین ہونے کا امکان ہے۔