مدھیہ پردیش کے جبل پور میں آگ لگنے کے باعث جھگی بستی کے 50 سے زائد مکانات جل کر راکھ ہو گئے، جس کے باعث کئی خاندان بے گھر ہوگئے ہیں۔ افسران کے مطابق ہفتہ (7 نومبر) کی علی الصباح ضلع کے غازی نگر علاقے میں واقع ایک جھگی بستی میں شدید آگ لگ گئی۔ اس واقعے میں 50 سے زائد جھگیاں جل کر راکھ ہوگئیں اور کئی خاندان بے گھر ہوگئے۔
پولیس کے مطابق اب تک کسی جانی نقصان کی اطلاع نہیں ہے۔ آگ علی الصباح تقریباً 2 بجے گوہل پور تھانہ علاقے میں لیما گارڈن کے قریب واقع جھگی بستی میں لگی۔ آگ کے شعلے تیزی سے پھیلے اور آس پاس کی کئی جھگیوں کو اپنی زد میں لے لیا۔ اس کے نتیجے میں لوگوں کا گھریلو سامان، اناج، کپڑے اور دیگر ضروری اشیاء جل کر تباہ ہوگئیں۔
فائر بریگیڈ افسران کے مطابق پولیس کنٹرول روم کو علی الصباح تقریباً 2 بجے آگ لگنے کی اطلاع ملی، جس کے فوراً بعد کئی فائر بریگیڈ گاڑیوں اور پانی کے ٹینکروں کو موقع پر روانہ کیا گیا۔ فائر فائٹر اوم پرکاش اہروار نے بتایا کہ اطلاع ملتے ہی آگ بجھانے اور بچاؤ کا کام شروع کردیا گیا۔ انہوں نے کہا کہ ’’پولیس کنٹرول روم کو رات 2 بجے اطلاع ملی کہ غازی نگر کی جھگیوں میں آگ لگ گئی ہے۔ ہم نے فوراً فائر بریگیڈ گاڑیاں اور پانی کے ٹینکر روانہ کیے اور بچاؤ کا کام شروع کردیا۔‘‘
پولیس اہلکاروں، فائر بریگیڈ کی ٹیموں اور بجلی محکمے کے افسران نے مل کر اس ہنگامی کارروائی کو انجام دیا۔ موقع پر تقریباً 8 سے 9 فائر بریگیڈ گاڑیاں تعینات کی گئیں، جبکہ احتیاطی طور پر ایمبولنس بھی موجود تھیں۔ ڈی ایس پی اکھلیش گور نے بتایا کہ آگ پر کافی حد تک قابو پالیا گیا ہے اور کسی جانی نقصان کی کوئی اطلاع نہیں ہے۔ انہوں نے بتایا کہ متاثرہ بستی میں ابتدائی اندازے کے مطابق 40 سے 50 خاندان رہتے تھے۔ ان کے مطابق آگ بجھانے کا کام مکمل ہونے کے بعد ہی تباہ ہونے والے مکانات کی صحیح تعداد معلوم ہوسکے گی۔
