نئی دہلی: خبر رساں ادارے Reuters کی رپورٹ کے مطابق بھارت کی تنظیم Rashtriya Swayamsevak Sangh (آر ایس ایس) اقلیت مخالف سرگرمیوں اور شدت پسند نظریات کے الزامات کے باعث شدید عالمی دباؤ کا شکار ہو گئی ہے۔
رپورٹ میں کہا گیا ہے کہ آر ایس ایس پر ہندوتوا نظریے اور اقلیتوں کے خلاف تشدد کو فروغ دینے کے الزامات طویل عرصے سے لگتے رہے ہیں، جبکہ اسے ماضی میں بھی اپنے مبینہ شدت پسند رجحانات کے باعث بعض اوقات پابندیوں کا سامنا کرنا پڑا ہے۔
رائٹرز کے مطابق بھارتی حکمران جماعت Bharatiya Janata Party (بی جے پی) کے دور حکومت میں آر ایس ایس کے نظریاتی اثر و رسوخ میں اضافہ دیکھا گیا ہے، جبکہ رام مندر کی تعمیر اور کشمیر کی خصوصی حیثیت کے خاتمے کو اس کے بڑے سیاسی اہداف کی کامیابی قرار دیا گیا ہے۔
رپورٹ میں یہ بھی دعویٰ کیا گیا ہے کہ امریکی کمیشن برائے بین الاقوامی مذہبی آزادی نے آر ایس ایس پر پابندیوں کی سفارش کی ہے، جس میں اثاثے منجمد کرنے اور امریکا میں داخلے پر پابندی جیسے اقدامات شامل ہیں۔
مزید کہا گیا ہے کہ دباؤ بڑھنے کے بعد آر ایس ایس نے اپنی عالمی لابنگ سرگرمیاں تیز کر دی ہیں اور اس کے رہنما امریکا، برطانیہ اور جرمنی سمیت مختلف ممالک میں رابطوں کو بڑھا رہے ہیں۔
سیاسی تجزیہ کاروں کے مطابق اس صورتحال نے بھارت کی خارجہ ساکھ اور انسانی حقوق کے حوالے سے عالمی سطح پر نئی بحث چھیڑ دی ہے، جبکہ اقلیتوں سے متعلق پالیسیوں پر بھی سوالات اٹھ رہے ہیں۔
