نئی دہلی: بھارتی وزیرِ اعظم نریندر مودی کے قافلے کے راستے سے دھماکا خیز مواد ملنے کے معاملے میں تحقیقات کے بعد پولیس کے چھ اہلکاروں کو غفلت برتنے پر معطل کر دیا گیا ہے۔
بھارتی ذرائع ابلاغ کے مطابق یہ واقعہ دس مئی کو بنگلورو کے علاقے کگلپورا میں پیش آیا، جہاں وزیرِ اعظم ایک تقریب میں شرکت کے لیے جا رہے تھے۔
رپورٹس کے مطابق حکام نے بتایا کہ وزیرِ اعظم کی آمد سے قبل معمول کی حفاظتی جانچ اور کلیئرنس کارروائی کے دوران قافلے کے راستے کے قریب سے جیلاٹن کی چھڑیاں برآمد ہوئی تھیں۔
حکام کا کہنا ہے کہ واقعے کے بعد چھ پولیس اہلکاروں کو معطل کر دیا گیا ہے جبکہ تفصیلی تحقیقات کا آغاز بھی کر دیا گیا ہے تاکہ یہ معلوم کیا جا سکے کہ دھماکا خیز مواد وزیرِ اعظم کے راستے تک کیسے پہنچا اور آیا اس کے پیچھے کوئی منصوبہ بندی شامل تھی یا نہیں۔
