بھارتی فورسز کی سرکریک میں گھس کردیگر ماہی گیروں کو بھی پکڑنے کی کوشش
ماہی گیروں کی گرفتاری کی خبر ملتے ہی ان کے گھروں میں کہرام مچ گیا‘ میڈیا رپورٹس
سجاول (مانیٹرنگ ڈیسک) بھارتی سیکورٹی فورس نے پاکستان کی سمندری حدود کی خلاف ورزی کرتے ہوئے سرکریک میں گھس کر 2 ماہی گیر اغواء کرلیے اور کشی بھی ضبط کرلی۔میڈیا ذرائع کے مطابق مغوی ماہی گیر احمد ولد صالح تیمور اور حمزہ تیمور کا تعلق ضلع سجاول کی تحصیل جاتی کے علاقے گجو بارڑی کے گاؤں جڑیو تیمور سے ہے۔بھارتی فورسز نے دیگر ماہی گیروں کو بھی پکڑنے کے لیے ان کا تعاقب کیا۔ماہی گیروں کی گرفتاری کی خبر ملتے ہی ان کے گھروں میں کہرام مچ گیا۔ دوسری جانب انصار برنی انٹر نیشنل ٹرسٹ کے سربراہ اور سابقہ وفاقی وزیر برائے انسانی حقوق انصار برنی اور فشر فورک رہنما نور محمد تیمور نے واقعے پراحتجاج کرتے ہوئے کہا ہے کہ بھارتی اہلکاروں کی جانب سے سمندری حدود کی خلاف ورزی کرکے غریب ماہی گیروں کو گرفتار کرنا اور انہیں کئی برس تک جیلوں میں قید کرنا کون سا قانون ہے۔رہنمائوں نے پاکستانی حکومت سے مطالبہ کیا ہے کہ اس قسم کے پے درپے پیش آنے والے واقعات کا نوٹس لیا جائے اور ضلع سجاول و ٹھٹھہ کے گرفتار دیگر62 ملاحوں کی آزادی کے لیے فوری اقدام کیے جائیں۔