مقبوضہ بیت المقدس(انٹرنیشنل ڈیسک) قابض صہیونی حکام نے بیت المقدس کے جنوبی علاقے جبل مکبر میں یہود کے لیے شہر کی سب سے بڑی کالونی کی تعمیر کا کام شروع کردیا۔اس کالونی میں یہود کی رہایش کے لیے 176 رہایشی فلیٹ اور مکان تعمیر کیے جائیں گے۔عبرانی اخبار ہارٹز نے اپنی رپورٹ میں بتایا کہ یہ مکانات نوو ٹزیون یہودی کالونی میں تعمیر کیے جائیں گے۔ عبرانی اخبار کے مطابق نوو ٹزیون کالونی میں یہ یہودی آباد کاری کا سب سے بڑا منصوبہ ہے، جس میں فوری طور پر 96 مکانات تعمیر کیے جائیں گے۔ مزید تعمیرات کے بعد مذکورہ یہودی کالونی میں یہود کے لیے تعمیر کردہ گھروں کی تعداد 550 ہوجائے گی۔ فی الحال اس منصوبے کے ابتدائی مرحلے پرکام جاری ہے۔ اگلے مرحلے میں 350 مکان، ہوٹل اور میٹرو ٹرین بھی بنائی جائے گی۔ اس منصوبے میں اسی علاقے میں ایک بڑے دیو ہیکل ہوٹل کا منصوبہ بھی شامل ہے، جس میں 150 کمرے بنائے جائیں گے۔ دوسری جانب اسرائیلی فوج نے الخلیل میں بیت کحیل قصبے پر دھاوا بول کر فلسطینی اسیران کے 4 مکان مسمار کر دیے۔ مسمار شدہ مکان اسیران احمد عصافرہ، اس کے بھائیوں قاسم عصافرہ ، نصیر عصافرہ اور یوسف ظہور کی ملکیت ہیں۔ مسماری سے مکانات میں رہنے والے لوگ بے گھر ہو گئے۔ ذرائع نے کہا کہ قابض اسرائیلی فوجیوں نے مسماری شروع کرنے سے پہلے علاقے کو گھیرے میں لے لیا اور بعد میں مقامی نوجوانوں اور فوجیوں کے درمیان جھڑپیں پھوٹ پڑیں۔قابض اسرائیلی حکام نے اسیران پر چند ماہ قبل الخلیل کے شمال میں سڑک پر غیر قانونی بستی عتصیون پر اسرائیلی فوجی کے قتل کا الزام لگایا۔اسی طرح اسرائیلی فوج نے نابلس کے نواحی قصبے عصیرہ میں بھی ایک مکان مسمار کردیا۔اس دوران فلسطینیوں نے مزاحمت کی، جن پر اسرائیلی فوج نے تشدد کیا، جس سے 10افراد زخمی ہوگئے۔ادھر اسرائیلی فوجیوں نے رام اللہ سے یونیورسٹی کے 2 طلبہ کو اغوا کر لیا۔
