احتساب عدالت کے فیصلے کیخلاف شہباز فیملی14 دن میں اعتراضات فائل کرسکتی ہے
نیب کی جانب سے مطلوب ریکارڈ جمع کرانے کے بعد احتساب عدالت نے محفوظ فیصلہ سنادیا
لاہور (این این آئی) احتساب عدالت نے سابق وزیراعلیٰ پنجاب شہباز شریف خاندان کے اثاثے منجمد کرنے کا حکم دے دیا۔ نیب کی جانب سے تمام مطلوبہ ریکارڈ احتساب عدالت میں جمع کرا گیا جس کے بعد فیصلہ محفوظ کیا گیا تھا۔ شہباز شریف فیملی 14 دن میں اعتراضات فائل کر سکتی ہے، احتساب عدالت کے جج چوہدری امیر محمد خان نے نیب کی درخواست پر فیصلہ سنایا۔ فیصلے میں عدالت نے نیب کی درخواست منظور کرتے ہوئے شہباز شریف، حمزہ شہباز، سلمان شہباز، نصرت شہباز، تہمینہ درانی کے اثاثے منجمد کرنے کا حکم دیا، نیب کی جانب سے عدالت میں شہباز شریف فیملی کے 23 اثاثوں کا ریکارڈ پیش کیا گیا جن میں ماڈل ٹائون میں دو رہائش گاہیں، چنیوٹ میں 389 کینال زمین، ایبٹ آباد میں نشاط لاجز، ڈی ایچ اے کے دو گھر، پیرسوہاوہ میں 3 جائیدادیں، جوہر ٹائون اور جوڈیشل کالونی میں پلاٹس جبکہ 9 کمپنیوں میں شیئرز سمیت دیگر اثاثے شامل ہیں۔