متحدہ تحریک انصاف سے اتحاد ختم کرکے ہمارا ساتھ دے ٗ جتنی وزارتیں وفاق میں ایم کیو ایم کے پاس ہیں ہم وہ سندھ میں دینے کو تیار ہیں ٗ بلاول بھٹو زرداری
وفاقی حکومت سے اتحاد کراچی کے مفاد کیلئے کیا تھا ٗ وزارتوں کیلئے نہیں کیا تھا ٗ بلاول وزارتیں دینے کے بجائے مقامی حکومت کو بااختیار بنائیں ٗ ایم کیو ایم پاکستان
بلاول کی پیشکش سے لگتا ہے سندھ حکومت خطرے میں ہے ٗ پیپلز پارٹی کی سیاسی پوزیشن مضبوط نہیں ہے ٗ ایم کیو ایم کو لالچ دے کر بلاول مفادات کی سیاست کررہے ہیں ٗ شبلی فراز
اسلام آباد(مانیٹرنگ ڈیسک)پاکستان تحریک انصاف کے رہنما اور سینیٹ میں قائد ایوان شبلی فراز نے پاکستان پیپلزپارٹی (پی پی پی) کے چیئرمین بلاول زرادری کی جانب سے ان کی اتحادی جماعت متحدہ قومی موومنٹ (ایم کیو ایم) پاکستان کو وفاق میں اتحاد توڑنے کی پیش کش کو نامناسب قرار دے دیا۔بلاول زرداری کی ایم کیو ایم پاکستان کو کی گئی پیش کش پر ردعمل میں شبلی فراز نے کہا کہ بلاول کو اپنی سیاست اور حکومت خطرے میں لگ رہی ہے۔سینیٹ میں قائد ایوان کا کہنا تھا کہ ایم کیو ایم کو پیش کش سے متعلق بیان سے لگتا ہے سندھ حکومت خطرے میں ہے اور بلاول کی پیش کش بھی اسی کی عکاسی کرتی ہے۔انہوں نے کہا کہ بلاول کا اس طرح کا بیان نہ تو ملک کی خدمت ہے اور نہ ہی جمہوریت کی خدمت ہے، انہیں اس طرح کی باتیں زیب نہیں دیتیں۔شبلی فراز کا کہنا تھا کہ بلاول ایم کیو ایم پاکستان کو لالچ دے کر مفادات کی سیاست کر رہے ہیں کیونکہ پیپلز پارٹی کی سیاسی پوزیشن مضبوط نہیں ہے اور خود کو مضبوط کرنے کے لیے سہارا ڈھونڈ رہی ہے۔ایم کیو ایم اور پی ٹی آئی کے اتحاد پر بات کرتے ہوئے ان کا کہنا تھا کہ ایم کیو ایم کے ساتھ اتحاد وزارتوں کی بنیاد پر نہیں بلکہ اصولوں کی بنیاد پر ہے اور ایم کیو ایم ایک مضبوط اتحادی جماعت کی طرح ہمارے ساتھ کھڑی ہے۔ان کا کہنا تھا کہ ایم کیو ایم اور ہمارے درمیان کوئی غلط فہمی یا مسائل نہیں ہیں اور یم کیو ایم کے ساتھ اتحاد کراچی اور پورے ملک کی بہتری کے لیے چلتا رہے گا۔