ویب ڈیسک —
پاکستان میں تعلیمی ادارے کھولنے یا نہ کھولنے سے متعلق حتمی فیصلہ پیر کو کیا جائے گا۔
تدریسی عمل کی دوبارہ بحالی سے متعلق اجلاس وفاقی وزیرِ تعلیم شفقت محمود کی زیرِ صدارت اسلام آباد میں ہو گا جس میں تمام صوبوں کے وزرائے تعلیم بھی شرکت کریں گے۔
بین الصوبائی وزرائے تعلیم کے اجلاس میں 15 ستمبر سے اسکول کھولنے یا نہ کھولنے سے متعلق مشاورت ہو گی اور اس حوالے سے حتمی فیصلہ کیا جائے گا۔
پاکستان میں کرونا وائرس کے پھیلنے کے بعد ملک بھر میں تقریباً چھ ماہ سے تعلیمی ادارے بند ہیں۔ اس عرصے کے دوران بعض غیر سرکاری اسکولوں میں آن لائن تدریسی عمل بھی جاری رہا۔
بین الصوبائی وزرائے تعلیم کے اجلاس کے ایجنڈے کے مطابق مختصر تعلیمی نصاب اور 2021 میں امتحانات پر غور کیا جائے گا۔
وفاقی وزیر تعلیم شفقت محمود نے حال ہی میں میڈیا بریفنگ کے دوران کلاسز کو مرحلہ وار کھولنے کا عندیہ دیا تھا۔