پشاور/ کوئٹہ/ نوابشاہ/ ڈی آئی خان (خبر ایجنسیاں) ملک کے مختلف شہروں میں ٹریفک حادثات کے نتیجے میں 12 افراد جاں بحق اور 5 زخمی ہوگئے۔ تفصیلات کے مطابق پشاور میں پولیس اسٹیشن خزانہ کی حدود شیرو جنگی میں گزشتہ شب موٹر کارحادثے میں 4 افرادجاں بحق جبکہ 2 زخمی ہوگئے، ریسکیو 1122 نے لاشوں و زخمیوںکوطبی امدادکیلیے اسپتال منتقل کردیا۔ علاوہ ازیں بلوچستان کے علاقے خضدار وہیر قومی شاہراہ پر ٹریلر اور کار میں تصادم سے 3 افراد جاں بحق جبکہ 2 زخمی ہوگئے۔ زخمیوں کی حالت تشویشناک بتائی جاتی ہے۔ دوسری جانب نواب شاہ میں قومی شاہراہ پر کراچی سے لاہور جانے والا ٹرالر قاضی احمد کے قریب تیز رفتاری کے باعث الٹ گیا جس کے نتیجے میں 3 افراد ٹرالر کے نیچے دب کر جاں بحق ہوگئے۔ علاوہ ازیں ڈیرہ اسماعیل خان میں انڈس ہائی وے پر موٹر سائیکل بے قابو ہوکر گرگئی اور پیچھے سے آنے والا تیز رفتار ٹرک موٹر سائیکل سوار 3 بہن بھائیوں پر چڑھ گیا، 6 سالہ عبداللہ اور 24 سالہ ریحانہ دم توڑ گئی اور ظفر زخمی ہوگیا۔ حادثے کے بعد ڈرائیور ٹرک چھوڑ کر فرار ہوگیا۔ پولیس نے زخمی ظفر کی رپورٹ پر مقدمہ نامعلوم ٹرک ڈرائیور کیخلاف درج کرلیا۔