سرینگر: کنٹرول لائن کے دونوں جانب اور دنیا بھر میں مقیم کشمیری آج یوم حق خود ارادیت منارہے ہیں جس کا مقصد کشمیری عوام کے ساتھ اظہار یکجہتی کرنا ہے.
پاکستان سمیت دنیا بھر میں مقیم کشمیری آج یوم حق خود ارادیت اس عزم کی تجدید کے ساتھ منارہے ہیں کہ بھارتی تسلط سے مکمل آزادی تک جدوجہد آزادی کشمیر کو ہرصورت میں جاری رکھا جائے گا۔
یہ دن منانے کا مقصد عالمی برادری کو اس بات کی یاد دہانی کرانا ہے کہ 7 دہائیوں سے زائد کا عرصہ گزرجانے کے باوجود مقبوضہ کشمیر کے بارے میں اقوا م متحدہ کی قراردادوں پر عملدرآمد نہیں ہوا ہے اور اس خاص دن کے حوالے سے آج دنیا بھر میں ریلیوں، سیمینارز اور کانفرنسوں کا انعقاد کیا جائے گا۔
یاد رہے کہ یوم یکجہتی کشمیر ہرسال 5 فروری کو منایا جاتا ہے، بھارت کی جانب سے مقبوضہ کشمیر کی خصوصی حیثیت ختم کرنا اور غیر قانونی لاک ڈائون کے نفاذ کے باعث اس دن کی اہمیت میں کافی اضافہ ہوگیا ہے.