برطانوی شہزادہ ہیری اور ان کی اہلیہ میگھن مارکل کی جانب سے امریکی ٹی وی میزبان اوپرا ونفرے کو دیے گئے انٹرویو نے جہاں شاہی محل میں بھونچال مچا دیا ہے، وہیں دنیا بھر میں اس انٹرویو کی گونج سنائی دینے لگی ہے۔
خبر رساں ادارے ایسوسی ایٹڈ پریس (اے پی) کے مطابق شہزادہ ہیری اور میگھن مارکل کی جانب سے 7 اور 8 مارچ کو امریکا اور برطانیہ میں سی بی ایس ٹی وی اور آئی ٹی وی پر نشر کیے گئے انٹرویو سے دنیا بھر میں شاہی خاندان کے حوالے سے نئی بحث چھڑ گئی۔
دو گھنٹے سے زیادہ دورانیے کے انٹرویو میں میگھن مارکل اور ان کے شوہر شہزادہ ہیری نے پہلی بار کھل کر برطانوی شاہی محل کے اندر ہونے والے معاملات کو دنیا کے سامنے رکھا تھا اور کئی سنگین انکشافات بھی کیے تھے۔
طویل انٹرویو کے دوران میگھن مارکل نے انکشاف کیا تھا کہ جب وہ پہلے بچے کی امید سے تھیں تب شاہی خاندان کے کسی فرد نے شہزادہ ہیری سے پوچھا تھا کہ ان کے ہاں پیدا ہونے والے بچے کا رنگ کتنا سیاہ ہوگا؟
میگھن مارکل کا کہنا تھا کہ چوں کہ وہ شاہی خاندان کی پہلی غیر سفید فام فرد بنی تھیں، اس لیے ان کی رنگت اور ان کے ہاں پیدا ہونے والے بچے کی پیدائش سے قبل ہی اس کی رنگت سے متعلق باتیں کی جاتی تھیں۔
اسی انٹرویو میں شہزادہ ہیری نے واضح کیا تھا کہ ان کے بیٹے کی پیدائش سے قبل ہی ان کے بیٹے کی رنگت سے متعلق باتیں کرنے والے افراد ملکہ برطانیہ یا ان کے شوہر نہیں تھے۔
تاہم شہزادہ ہیری اور میگھن مارکل نے اس شخص کا نام نہیں بتایا تھا، جنہوں نے ان کے ہاں پیدائش سے قبل ہی ان کے بیٹے کی رنگت سے متعلق سوالات کرنا شروع کردیے تھے۔
انٹرویو کے دوران میگھن مارکل نے شاہی محل میں نسلی امتیاز اور ذہنی مسائل کے شکار ہونے جیسے معاملے پر بھی کھل کر بات کی تھی اور بتایا تھا کہ انہوں نے مسائل سے تنگ آکر خودکشی کرنے کا سوچا تھا۔
انٹرویو میں شہزادہ ہیری نے بتایا تھا کہ انہوں نے جیسے ہی شاہی حیثیت سے دستبرداری کا اعلان کیا تو شاہی محل نے ان کی مالی معاونت بند کردی تھی اور اس فیصلے پر انہیں تکلیف بھی پہنچی۔
میگھن مارکل اور شہزادہ ہیری کے انٹرویو کے بعد امریکا اور برطانیہ سمیت دنیا بھر میں شاہی خاندان اور شاہی محل کے رویے پر باتیں ہونے لگی ہیں اور دنیا بھر کے نامور سیاستدانوں اور سماجی رہنماؤں نے بھی ہیری اور ان کی اہلیہ سے ہمدردی کا اظہار کیا ہے۔
امریکی صدر کے ترجمان نے بھی میگھن مارکل اور ہیری کے انٹرویو پر تبصرہ کرتے ہوئے کہا ہے کہ صدر جوبائیڈن نے ہمیشہ ذہنی صحت جیسے معاملات کی حوصلہ افزائی کی ہے۔
جوبائیڈن کے علاوہ امریکا اور برطانیہ کے متعدد سیاستدانوں، ٹی وی شخصیات اور نامور صحافیوں نے بھی کھل کر بات کی ہے اور شاہی محل پر انٹرویو سے متعلق وضاحتی بیان جاری کرنے کے لیے دباؤ بڑھ چکا ہے تاہم شاہی محل نے تاحال کوئی بیان جاری نہیں کیا۔
’رائٹرز‘ کے مطابق میگھن مارکل اور شہزادہ ہیری کے انٹرویو پر دنیا بھر میں بحث چھڑ جانے کے باوجود شاہی محل نے کوئی بیان جاری نہیں کیا۔
شاہی محل کے ترجمان کے ذرائع کا کہنا تھا کہ شاہی محل اس بات کی توقع نہیں رکھتا کہ اس پر میگھن و ہیری کے انٹرویو پر وضاحتی بیان جاری کرنے کے لیے دباؤ ڈالا جانا چاہیے۔
تاہم دوسری جانب بی بی سی نے اپنی رپورٹ میں دعویٰ کیا کہ اگرچہ شاہی محل نے شہزادہ ہیری اور میگھن مارکل کے انٹرویو پر کوئی وضاحتی بیان جاری نہیں کیا تاہم انٹرویو کے بعد محل میں اعلیٰ سطح کا ہنگامی اجلاس کا انقعاد کیا گیا۔
رپورٹ میں بتایا گیا کہ شہزادہ ہیری اور میگھن مارکل کے انٹرویو کے بعد 9 مارچ کو شاہی محل میں اعلیٰ سطح کا ہنگامی اجلاس ہوا، جس میں محل کے تمام ارکان نے شرکت کی۔
اجلاس میں شہزادہ ہیری اور ان کی اہلیہ کی جانب سے انٹرویو میں کیے گئے دعووں پر غور کیا گیا تاہم اجلاس سے متعلق بھی کوئی بیان جاری نہیں کیا گیا۔
میگھن مارکل و شہزادہ ہیری کے انٹرویو کا ریکارڈ
برطانوی شاہی خاندان کے چھوٹے شہزادے ہیری اور ان کی اہلیہ میگھن مارکل نے حال ہی میں امریکی ٹی وی اسٹار اوپرا ونفرے کو انٹرویو دیا تھا، جسے 7 مارچ کو امریکا اور 8 مارچ کو برطانیہ میں نشر کیا گیا تھا۔
میگھن مارکل اور ان کے شوہر شہزادہ ہیری کا انٹرویو 2 گھنٹے کے دورانیے سے زیادہ طویل تھا اور اس انٹرویو کو حالیہ دور میں مغربی دنیا کا سب سے اہم ترین انٹرویو کہا جا رہا ہے۔
جہاں مذکورہ انٹرویو کو مغربی دنیا کا سب سے اہم ترین انٹرویو کہا جا رہا ہے، وہیں اسے برطانوی شاہی خاندان کا بھی 1997 کے بعد سب سے اہم انٹرویو قرار دیا جا رہا ہے۔
اس طویل انٹرویو میں میگھن مارکل نے شاہی محل میں نسلی امتیاز اور وہاں پر قیدی کی طرح زندگی گزارنے سے اپنی ذہنی صحت پر پڑنے والے اثرات پر کھل کر بات کی تھی۔
جب کہ شہزادہ ہیری نے بھی انٹرویو میں بتایا تھا کہ کس قدر وہ اور ان کی اہلیہ شاہی محل میں مجبور تھے۔
دونوں نے بتایا تھا کہ ان کے ہاں پہلے بچے کی پیدائش سے قبل ہی شاہی محل میں یہ چہ مگوئیاں ہونا شروع ہوگئی تھیں کہ نہ جانے ان کے بچے کی رنگت کتنی سیاہ ہوگی؟
ساتھ ہی شہزادہ ہیری نے بتایا تھا کہ جب ان کی اہلیہ میگھن مارکل پر برطانوی میڈیا میں غلط خبریں شائع ہو رہی تھیں، تب بھی شاہی محل نے ان کی مدد نہیں کی۔
میگھن مارکل نے بتایا تھا کہ غلط خبروں اور شاہی محل میں نسلی امتیاز جیسی باتوں پر انہوں نے خودکشی کرنے کا بھی سوچا تھا۔
مذکورہ انٹرویو کو امریکا میں سی بی ایس اور برطانیہ میں آئی ٹی وی نے نشر کیا اور اس انٹرویو کو دونوں ممالک میں تقریبا 3 کروڑ بار دیکھا جا چکا ہے۔
خبر رساں ادارے ایسوسی ایٹڈ پریس (اے پی) کے مطابق امریکا میں ٹی وی ریٹنگ پر نظر رکھنے والے اہم ترین ادارے کے 9 مارچ کی دوپہر کو جاری کیے گئے اعداد و شمار کے مطابق شاہی جوڑے کے انٹرویو کو امریکا میں ایک کروڑ 71 لاکھ سے زائد بار دیکھا جا چکا ہے۔
رپورٹ میں بتایا گیا کہ جہاں ہیری اور میگھن مارکل کے انٹرویو کو ریکارڈ مرتبہ دیکھا گیا، وہیں ریٹنگ میں بھی ان کے انٹرویو کو اچھے اسٹارز دیے گئے ہیں، چوں کہ ڈیڑھ کروڑ بار ان کے انٹرویو کو پورا دیکھا گیا۔
اعداد و شمار کے مطابق ایک کروڑ 70 لاکھ بار دیکھے جانے والے انٹرویو کو محض 30 لاکھ بار مکمل دورانیے سے کم دیکھا گیا۔
جوڑے کے انٹرویو نے دنیا بھر میں تہلکہ مچا دیا—فوٹو: اے پی
اسی طرح ’رائٹرز‘ نے اپنی رپورٹ میں بتایا کہ برطانیہ کی آئی ٹی وی نے 9 مارچ کو بتایا کہ میگھن مارکل و شہزادہ ہیری کے انٹرویو کو ایک کروڑ 25 لاکھ بار دیکھا جا چکا ہے۔
برطانیہ میں طویل انٹرویو کو ایک کروڑ 10 لاکھ سے زائد بار مکمل دیکھا گیا۔
شہزادہ ہیری اور ان کی اہلیہ کے انٹرویو کو امریکا اور برطانیہ میں ’انٹرٹینمنٹ‘ اور ’لائف اینڈ اسٹائل‘ کے انٹرویو کے طور پر نشر کیا گیا اور دونوں کیٹیگریز میں ان کا انٹرویو پہلا انٹرویو بنا ہے، جسے ریکارڈ بار دیکھا گیا۔
مجموعی طور پر شاہی جوڑے کے انٹرویو کو امریکا اور برطانیہ میں 3 کروڑ سے زائد بار دیکھا گیا جب کہ یوٹیوب اور دیگر سوشل میڈیا پلیٹ فارمز پر بھی ان کے انٹرویوز کی کلپس کو کروڑوں بار دیکھا جا چکا ہے۔
میگھن مارکل اور شہزادہ ہیری کے انٹرویو نشر ہوتے ہی دنیا بھر کی میڈیا میں ان کے انٹریو کی خبریں ’شہ سرخی‘ کے طور پر شائع ہوئیں جب کہ امریکا اور برطانیہ کے اخبارات و جرائد نے ان کے انٹرویوز پر خصوصی اشاعتیں بھی کیں۔
میگھن مارکل اور شہزادہ ہیری کے انٹرویو سے نہ صرف امریکا اور برطانیہ بلکہ دنیا بھر میں برطانوی شاہی خاندان اور شاہی محل کی 12 ہزار سال کی تاریخ پر بحث شروع ہوچکی ہے۔
اسی انٹرویو کے حوالے سے ایسوسی ایٹڈ پریس (اے پی) نے اپنی رپورٹ میں بتایا کہ دنیا بھر میں ایک بار پھر اوپرا ونفرے کی تعریفیں کی جا رہی ہیں اور انہیں ’انٹرویوز کی شہزادی‘ قرار دیا جا رہا ہے۔
اوپرا ونفرے نے میگھن مارکل و شہزادہ ہیری سے قبل بھی متعدد معروف شخصیات کے انٹرویوز کیے ہیں اور وہ گزشتہ 2 دہائیوں سے ٹی وی کی دنیا کی سپر اسٹار بنی ہوئی ہیں۔
اے پی کی رپورٹ کے مطابق میگھن مارکل اور شہزادہ ہیری کے انٹرویو کی ریکارڈنگ کیلی فورنیا کے پارک میں کی گئی تھی اور اسے اوپرا ونفرے کے ذاتی پروڈکشن ہاؤس نے ریکارڈ اور ایڈٹ کیا۔
مذکورہ انٹرویو کے لیے اوپرا ونفرے کے پروڈکشن ہاؤس کو سی بی ایس ٹیلی وژن نیٹ ورک نے 90 لاکھ امریکی ڈالر یعنی پاکستانی سوا ارب روپے کی رقم فراہم کی۔
یہ واضح نہیں ہے کہ مذکورہ رقم صرف انٹرویو کو ریکارڈ کرنے کی مد میں ادا کی گئی یا اسی رقم میں اوپرا ونفرے کی فیس بھی شامل تھی۔
منبع: ڈان نیوز