کراچی: سپریم کورٹ کے حکم پر نسلہ ٹاور کو مسمار کرنے سے قبل بلڈنگ کے بجلی، گیس اور پانی کے کنکشن منقطع کردیے گئے ہیں۔
میڈیا رپورٹس کے مطابق سپریم کے احکامات کی روشنی میں کے الیکٹرک نے نسلہ ٹاور کی بجلی کاٹ دی، جبکہ سوئی سدرن گیس اور کراچی واٹر اینڈ سیوریج بورڈ نے گیس اور پانی کے کنکشن منقطع کردیے ہیں۔ اس موقع پر نسلہ ٹاور کے رہائیشوں نے احتجاج کیا اور انہیں روکنے کی کوشش کی تاہم ان کا احتجاج کسی کام نہ آیا۔
دوسری جانب کمشنر کراچی نے سربراہ ایف ڈبلیو او اور ڈی جی ایس بی سی اے کو خط لکھ دیا ہے، جس میں کہا گیا ہے کہ نسلہ ٹاور کی کنٹرولڈ ڈیمولیشن میں ایف ڈبلیو او معاونت فراہم کرے۔
خیال رہے کہ گزشتہ روز سپریم کورٹ نے کراچی میں واقع رہائشی عمارت نسلہ ٹاور کو ایک ہفتے میں دھماکا خیز مواد سے گرانے کا حکم دیا تھا، جبکہ چیف جسٹس نے کمشنر کراچی کو حکم دیا تھا کہ نسلہ ٹاور کے مالک سے رقم متاثرین کو واپس دلوائیں۔