ادیس ابابا (انٹرنیشنل ڈیسک) ایتھوپیا کی فوج نے باغی تیگرائے فورسز کے علاقوں پر بمباری کردی،جس کے نتیجے میں بچوں سمیت کئی افراد ہلاک ہوگئے۔ خبررساں اداروں کے مطابق ایتھوپیائی فوج کے جنگی طیاروں نے تیگرائے کے دارالحکومت میکیلے کے رہایشی علاقے پر بم برسائے،جس سے کئی مکانات تباہ ہوگئے اور وہاں رہنے والے افراد زخمی ہوگئے۔ ادھر ایتھوپیائی ترجمان کی جانب سے جاری بیان میں دعویٰ کیا گیا کہ کارروائی کے دوران تیگرائے میں ہتھیار بنانے والی فیکٹری کو نشانہ بنا یا گیا۔ انہوں نے اپنے بیان میں 6ہلاکتوں اور 20افراد کے زخمی ہونے کی تصدیق کی۔دوسری جانب تیگرائے کے شمالی اور مغربی حصوں میں ہونے والے بم دھماکوں میں شہری ہلاکتوں پر بین الاقوامی سطح پر تنقید کی جارہی ہے۔ ایک رپورٹ کے مطابق تیگرائے میں 4لاکھ افراد کو ناکابندی کے باعث قحط جیسی صورتحال کا سامنا ہے۔حالیہ کارروائی میکیل میں واقع قصبے کوئہا میں کی گئی ہے ، جسے ٹی پی ایل ایف نے جون میں حکومتی فورسز سے دوبارہ چھین لیا تھا ۔ حکومتی ترجمان سیلاموت کاسا نے اپنے بیان میں کہا کہ باغی گروہ میں غیر قانونی طور پر بھرتی کیے گئے فوجی اہلکاروں کی بڑی تعداد اس مرکز میں فوجی تربیت لے رہی تھی۔ادھر ٹی پی ایل ایف کے ترجمان کنڈیا گیبرہیوٹ نے بیان کی تردید کرتے ہوئے کہا کہ لڑاکا طیاروں نے میکیل سے 25 کلومیٹر مشرق میں کھیتوں پر بمباری کی اور ایک اور حملے کی کوشش کی لیکن ان کے فضائی دفاعی نظام نے انہیں پسپا کر دیا۔وہاں کوئی فوجی ہدف یا تربیتی مرکز نہیں تھا۔ ایتھوپیائی حکام تیگرائے کے لوگوں کو دہشت زدہ کرنا چاہتے ہیں۔ ترجمان نے کہا کہ گزشتہ ہفتے ایتھوپیا کی فضائیہ نے ان اہداف پر 8حملے کیے جن کے بارے میں حکومت کا کہنا تھا کہ وہ فوجی نوعیت کے تھے ۔ ان میں سے زیادہ تر میکیل میں اور اس کے آس پاس تھے۔ اتوار کے روز فوج نے دارالحکومت کے شمال میں میں مزید 2حملوں کی تصدیق کی۔ اقوام متحدہ کے مطابق 18 اکتوبر کو میکیل پر ہونے والے حملوں میں 3بچے ہلاک اور کئی دیگر زخمی ہوئے۔ ٹی پی ایل ایف نے کہا کہ یہ حملے حکومت کی جانب سے شہریوں کی زندگیوں کو نظر انداز کرنے کا ثبوت ہیں۔ ذرائع ابلاغ کے مطابق امریکاسمیت مغربی طاقتوں نے ان حملوں کو شہریوں کے لیے سنگین خطرہ قرار دیتے ہوئے اس کی مذمت کی ہے۔ یاد رہے کہ میکیل پر جمعہ کو ہونے والی ایک ہڑتال نے اقوام متحدہ کی پرواز کو 11 انسانی ہمدردی کے عملے کو لے کر ایتھوپیا کے دارالحکومت ادیس ابابا کو واپس جانے پر مجبور کردیا تھا۔