بھارت میں یوپی کے علاقے کُشی نگر کی شادی میں ماتم کا سماں پیدا ہوگیا، رسم کے لیے جمع ہونے والی 22 خواتین و بچیاں کنویں میں جاگریں ، ڈوبنے سے 9بچیوں سمیت 13 خواتین کی موت واقع ہوگئی جبکہ9کو بچالیا گیا.
بھارتی میڈیا کے مطابق کشی نگر ضلع کے گاؤں نورنگیا میں ایک شادی کی رسم نبھانے کے لئے خواتین اور بچیاں ایک کنویں کے پاس جمع تھیں، جہاں وہ ہلدی کے لیے مٹکوڑ کی رسم کرنے گئی تھیں کہ کنویں کا سلیب بھاری بوجھ سہار نہ سکا اور ٹوٹ گیا ۔
جاں بحق ہونے والی خواتین اور لڑکیوں کے اہل خانہ کا الزام ہے کہ حادثے کے بعد وہ تقریباً ڈیڑھ گھنٹے تک سرکاری ایمبولینس سروس کو مدد کے لیے فون کرتے رہے لیکن کوئی مدد کے لیے نہیں پہنچا جبکہ اس علاقے میں صرف تین کلومیٹر کے فاصلے پر اسپتال ہے۔۔
حادثے میں جاں بحق ہونے والی لڑکیوں کی عمریں 5 سے 15 سال کے درمیان ہیں۔ ہلاکتوں میں اضافہ کا اندیشہ ظاہر کیا گیا ہے۔
بعد ازاں بڑی تعداد میں انتظامیہ و پولیس کے لوگ وہاں پہنچ گئے اور ریسکیو سرگرمیاں شروع کردی گئیں ۔ حادثے کا شکار خواتین اور بچیوں کی شناخت کر لی گئی ہے جن کے اہل خانہ کو چار لاکھ روپے کے معاوضہ کا اعلان کیا گیا ہے۔