دبئی(جسارت نیوز)آئی سی سی ون ڈے رینکنگ میں قومی کپتان بابر اعظم کی حکمرانی برقرار ہے۔آئی سی سی نے ون ڈے کی نئی رینکنگ جاری کردی ہے جس میں بابر اعظم کی پہلی اور بھارت کے ویرات کوہلی کی دوسری پوزیشن برقرار ہے۔ جنوبی افریقاکے کوئنٹن ڈی کوک ایک درجے ترقی پاکر تیسری پوزیشن پر آگئے جبکہ بھارت کے روہت شرما ایک درجے تنزلی سے چوتھی پوزیشن پر چلے گئے جبکہ آسٹریلوی کپتان ایرون فنچ کی پانچویں پوزیشن برقرار ہے ۔جنوبی افریقا ریسی وینڈر ڈسن دو درجے ترقی پاکر چھٹی پوزیشن پر آگئے جبکہ انگلینڈ کے جونی بیئر اسٹو اور آسٹریلیا کے ڈیوڈ وارنر ایک ایک درجے تنزلی سے بالترتیب ساتویں اور آٹھویں پوزیشن پر چلے گئے۔پاکستان کے فخر زمان کی نویں اور انگلینڈ کے جو روٹ کی دسویں پوزیشن برقرار ہے۔دوسری طرف ٹیسٹ رینکنگ میں بابراعظم 5بہترین بلے بازوں کی فہرست میں شامل ہوگئے ہیں۔ قومی کپتان کی 3درجے اور نائب کپتان محمد رضوان کی 6درجے بہتری ہوئی ہے۔