امریکی پولیس نے سابق امریکی عالمی ہیوی ویٹ چمپیئن باکسر مائیک ٹائیسن کی جانب سے طیارے پر ایک شخص کی پٹائی کرنے کے معاملے کی تفتیش کا آغاز کردیا۔
خبر رساں ادارے ’ایسوسی ایٹڈ پریس‘ (اے پی) کے مطابق سابق باکسر کی جانب سے دوران پرواز مسافر کی پٹائی کرنے کی ویڈیو وائرل ہونے کے بعد امریکی ریاست کیلی فورنیا کے شہر سان فرانسسکو کی پولیس نے معاملے کی تفتیش شروع کردی۔
رپورٹ کے مطابق مائیک ٹائسن کے ترجمان نے بتایا کہ باکسر نے سان فرانسسکو ایئرپورٹ پر فلوریڈا کے لیے اڑان بھرنے کو تیار طیارے میں اپنے قریب بیٹھے ایک شخص کی اس وقت پٹائی کی جب مذکورہ شخص نے بار بار مائیک ٹائسن کا مذاق اڑایا۔
امریکی شوبز ویب سائٹ ’ٹی ایم زیڈ‘ کی جانب سے شیئر کی گئی ویڈیوز میں دیکھا جا سکتا ہے کہ طیارے میں موجود شخص مائیک ٹائسن کو قریب بیٹھا دیکھ کر خوشی سے پاگل ہوگیا اور باکسر کے حوالے سے باتیں کرنے لگا۔
Imagine being dumb enough to provoke Mike Tyson in the close proximity of a plane during a 3 hour flight😂😭🤦🏽♂️ pic.twitter.com/T3IBuB7lor
— 🛸🐐Ziggy B🐐🛸 (@therealziggyb23) April 21, 2022
رپورٹس کے مطابق مداح کی جانب سے بار بار مذاق کیے جانے اور مبینہ طور پر مائیک ٹائسن کی جانب پانی کی خالی بوتل پھینکے جانے کے بعد باکسر نے اس کی پٹائی کردی۔
ٹی ایم زیڈ نے مائیک ٹائسن کی جانب سے مداح کی پٹائی کرنے کی ویڈیو بھی شیئر کی گئی جو دیکھتے ہی دیکھتے دنیا بھر میں وائرل ہوگئی۔
وائرل ہونے والی ویڈیو میں مائیک ٹائسن کو پوری طاقت کے ساتھ مداح کی پٹائی کرتے دیکھا جا سکتا ہے جب کہ بعد ازاں مداح کے چہرے کو خون سے لت پت بھی دیکھا گیا۔
باکسر کی جانب سے مداح کی پٹائی کرنے کی ویڈیو سامنے آنے کے بعد پولیس نے واقعے کی تفتیش شروع کردی ہے، تاہم فوری طور پر کوئی بڑی پیش رفت نہیں ہو سکی اور مار کھانے والے مداح کی طبیعت خطرے سے باہر ہے۔
مائیک ٹائسن نے 20 سال کی عمر میں 1986 میں ٹریور بیربیک کو شکست دے کر کم عمر ترین ہیوی ویٹ چمپیئن بننے کا ریکارڈ قائم کیا تھا۔
See the moment Mike Tyson beat down an airplane passenger … footage obtained by @TMZ_Sports https://t.co/5qCbOdxP31 pic.twitter.com/Bf7zmyiux6
— TMZ (@TMZ) April 21, 2022