بین الاقوامی مالیاتی فنڈ (آئی ایم ایف) نے کہا کہ پاکستانی حکومت نے کم آمدنی والے گروپوں کے لیے پیٹرول سبسڈی پر عالمی قرض دہندہ سے مشورہ نہیں کیا۔
بلوم برگ کے مطابق پاکستان میں آئی ایم ایف کی نمائندہ ایسٹر پریز نے بتایا کہ حکومت پاکستان نے پیٹرولیم مصنوعات کی قیمتوں کے حوالے سے موٹرسائیکل اور گاڑیوں والوں سے متعلق اسکیم پر عالمی مالیاتی فنڈ سے کوئی مشورہ یا رابطہ نہیں کیا۔
پیریز نے کہا کہ “فنڈ کا عملہ اسکیم کے آپریشن، لاگت، ہدف سازی، دھوکہ دہی اور غلط استعمال کے خلاف تحفظات، اور آفسیٹ کرنے کے اقدامات کے حوالے سے مزید تفصیلات تلاش کر رہا ہے، اور ان عناصر کے بارے میں حکام کے ساتھ احتیاط سے بات کرے گا” ۔
ایک روز قبل وزیر مملکت برائے پیٹرولیم مصدق ملک نے اعلان کیا تھا کہ وفاقی حکومت نے مہنگائی سے متاثرہ عوام پر پیٹرول کی بلند قیمتوں کے اثرات کو کم کرنے کے لیے موٹر سائیکل سواروں اور 800cc تک کی گاڑیوں کے مالکان کے لیے پیٹرول پر 100 روپے تک سبسڈی دینے کا فیصلہ کیا ہے۔
ملک نے لاہور میں صحافیوں سے بات کرتے ہوئے کہا کہ وزیر اعظم شہباز شریف نے کم آمدنی والے افراد کو پٹرول پر 100 روپے فی لیٹر تک سبسڈی دینے کی ہدایت کی ہے۔ اس سے قبل 50 روپے فی لیٹر سبسڈی دینے کا فیصلہ کیا گیا تھا۔
وزیر نے کہا کہ ایک جامع حکمت عملی کے تحت موٹر سائیکل سواروں اور 800cc تک کی گاڑیوں کے مالکان کو سبسڈی والا پٹرول دستیاب ہوگا۔
ملک نے مزید کہا کہ 800cc سے زیادہ گاڑیوں کے مالکان سے پوری قیمت وصول کی جائے گی، رعایتی نرخوں پر ایندھن فراہم کرنے کا فیصلہ چھ ہفتوں کے اندر لاگو کیا جائے گا، انہوں نے مزید کہا کہ حکومت غریبوں کے لیے پیٹرول سستا کرے گی۔
ان کا کہنا تھا کہ بڑی گاڑیوں کے مالکان پیٹرول کے لیے زیادہ قیمت ادا کریں گے امیر پیٹرول پر 100 روپے زیادہ دیں گے جبکہ غریب 100 روپے کم دیں گے۔ 220 ملین کی آبادی میں 210 ملین لوگ غریب ہیں، ہم غریب پاکستان کے ساتھ کھڑے ہیں۔
انہوں نے کہا کہ گیس ٹیرف کے فیصلے کا اطلاق یکم جنوری سے ہو رہا ہے، ہمارے ہاں غریب اور امیر کے لیے الگ الگ ٹیرف ہیں۔