نگران وزیراعلیٰ پنجاب محسن نقوی نے پاک بحریہ کے جوانوں کو سراہتے ہوئے کہا کہ سمندری حدود کی حفاظت کرنے والے پاک بحریہ کے افسر اور جوان ہمارا فخر ہیں۔
تفصیلات کے مطابق نگران وزیراعلیٰ پنجاب محسن نقوی سے آج وزیر اعلی آفس میں کمانڈر سنٹرل پنجاب پاکستان نیوی اور کمانڈنٹ پاکستان نیوی وار کالج ریئر ایڈمرل جاوید اقبال نے ملاقات کی۔
ملاقات میں باہمی دلچسپی کے امور اور پاکستان نیوی کے پیشہ ورانہ معاملات پر تبادلہ خیال کیا گیا۔ 9 مئی کو عسکری تنصیبات اور شہداء کی یادگاروں پر حملوں کی مذمت کی گئی اورشہداء اور ان کے خاندانوں سے بھرپور یکجہتی کا اظہار کیا گیا۔
نگران وزیراعلیٰ محسن نقوی نے پاکستان نیوی کے افسروں اور جوانوں کی پیشہ ورانہ صلاحیتوں کو سراہا۔
محسن نقوی نے کہا کہ پاک بحریہ کے جانبازوں نے ہمیشہ شجاعت کی داستانیں رقم کی ہیں۔ سمندری حدود کی حفاظت کرنے والے پاک بحریہ کے افسر اور جوان ہمارا فخر ہیں۔ آرمی اور ایئر فورس کی طرح پاکستان نیوی نے بھی ہمیشہ دشمن کی جارحیت کا منہ توڑ جواب دیا ہے۔ وطن عزیز کی سمندری حدود کے دفاع میں پاکستان نیوی کا کردار سنہری حروف سے لکھا جائے گا۔
