ممبئی: بھارت کے لیجنڈری گلوکار اور موسیقار اے آر رحمان کے اعزاز میں ان کے نام پر فلم فیسٹیول منعقد کیا جائے گا۔
’اے آر رحمان فلم فیسٹیول‘ کا انعقاد پی وی آر سینماز کی طرف سے نامور گلوکار کے 30 برس کے شاندار میوزک کیرئیر کو خراج تحسین پیش کرنے کیلئے ہوگا۔
فلم فیسٹیول کو 4 اگست سے 9 اگست تک بھارتی شہروں چنائے اور کوئمبیٹور میں منعقد کیا جائے گا اور شائقین شرکت کرسکیں گے۔
اے آر رحمان نے اس خبر کو اپنے سوشل میڈیا اکاؤنٹ پر شیئر کرتے ہوئے نہایت خوشی کا اظہار کیا اور اپنے تمام مداحوں کا شکریہ بھی ادا کیا۔
انہوں نے لکھا کہ 30 سالہ میوزک کیریئر میں لوگوں کی محبت اور سپورٹ نے انہیں بہت مدد فراہم کی اور وہ اس پر بہت شکر گزار ہیں۔
بھارتی فلم ساز منی رتنم نے 1992 کی فلم ’روجا‘ سے اے آر رحمان کو لانچ کیا تھا اور انہوں نے اپنی بے پناہ صلاحیتوں سے بھارتی میوزک انڈسٹری میں انقلاب برپا کردیا۔