پشاور: وزیراعلی خیبرپختونخوا علی امین گنڈاپور کے صوبہ میں بجلی کی لوڈ شیڈنگ کے نوٹس پر صوبائی محکمہ داخلہ نے صوبے کے تمام ڈویژنل کمشنرز اور ڈپٹی کمشنرز کو خط لکھ دیا۔
صوبائی محکمہ داخلہ کی جانب سے خط میں کہا گیا ہے کہ تمام ڈپٹی کمشنرز لوڈشیڈنگ کے اوقات کی خود نگرانی کریں، کسی بھی علاقے یا ضلع میں لوڈشیڈنگ کا دورانیہ 12 گھنٹے سے زائد نہ ہو ، خرابی کی صورت میں کم سے کم وقت میں بجلی بحال کی جائے۔
خط کے متن میں کہا گیا کہ ہے کہ خیبرپختونخوا میں بعض مقامات پر 22 گھنٹے تک لوڈشیڈنگ ہو رہی ہے، بعض اضلاع میں لوڈ شیڈنگ کے خلاف احتجاج بھی ہو رہے ہیں، وزیراعلی نے تمام ڈپٹی کمشنرز کو پیسکو حکام سے میٹنگ کی ہدایات دی ہیں۔