اسلام آباد: حج کے دوران ہیٹ اسٹروک سے انتقال کرنے والے وزٹ ویزے پر آئے تھے، سعودی حکومت نے باقاعدہ رپورٹ پیش کردی۔
میڈیا رپورٹس کے مطابق سعودی حکام نے کہا ہے کہ رواں برس حج کے دوران انتقال کرنے والے عازمین کی اکثریت کے پاس حج کرنے کا اجازت نامہ نہیں تھا، حج کے دوران مکہ مکرمہ میں درجہ حرارت میں نمایاں اضافہ دیکھنے میں آیا اور اس سال مختلف ممالک سے بڑی تعداد میں زائرین سیاحت یا وزٹ ویزوں پر سعودی عرب پہنچے تھے۔
انہوں نے مزید کہاکہ حج کے دوران ہیٹ اسٹروک سے انتقال کرنے والے زائرین چلچلاتی دھوپ میں مقدس شہروں میں طویل فاصلہ پیدل طے کرتے رہے، جس کی وجہ سے وہ گرمی برداشت نہیں کرسکے،
خیال رہے کہ رواں برس حج کے دوران شدید گرمی کے باعث 550 سے زائد عازمین حج جاں بحق ہوگئے تھے، جن میں سے 320 کا تعلق مصر، 144 انڈونیشیا، 60 اردن، ایران 11 اور 3 کا تعلق سینیگال سے تھا۔
