لاہور: جماعت اسلامی پاکستان کے امیر، حافظ نعیم الرحمن نے حکومتی فیصلہ آپریشن عزم استحکام کو سختی سے مسترد کر دیا ہے۔
ایک بیان میں حافظ نعیم الرحمن نے کہا کہ پاکستان مزید کسی فوجی آپریشن کا متحمل نہیں ہو سکتا کیونکہ فوجی کارروائیاں مسائل کا حل نہیں ہیں۔ انہوں نے نشاندہی کی کہ گزشتہ 23 برسوں میں جتنے بھی آپریشنز کیے گئے، ان سے فائدے کی بجائے نقصان ہوا ہے۔
حافظ نعیم الرحمن نے کہا کہ ملک کو امریکہ کی نام نہاد دہشت گردی کے خلاف جنگ میں دھکیلا گیا، جس کے نتیجے میں ایک لاکھ پاکستانی سویلین اور سیکیورٹی اہلکار شہید ہوئے، مغربی سرحد غیر محفوظ ہوئی اور قومی معیشت کو اربوں ڈالر کا نقصان ہوا۔ اس جنگ سے پاکستان بیرونی ایجنسیوں کا اکھاڑا بن گیا۔
حافظ نعیم الرحمن نے زور دیا کہ افغانستان سے بامعنی مذاکرات کیے جائیں اور ایران پاکستان گیس پائپ لائن مکمل کی جائے۔ انہوں نے کہا کہ حکومت کو تمام اسٹیک ہولڈرز کو اعتماد میں لینا چاہیے اور فوج، عوام، جمہوریت اور پاکستان کے مفاد میں ایسے فیصلے کرنے چاہئیں جو ملک کو بحران سے بچا سکیں۔