صنعا (انٹرنیشنل ڈیسک) حوثی باغیوں نے یمنی فضائی کمپنی کے 4طیاروں پر قبضہ کرلیا۔ خبررساں اداروں کے مطابق یمن میں صدارتی قیادت کونسل نے حوثی ملیشیا کی جانب سے قومی فضائی کمپنی کے طیاروں کو اغوا کرنے کے عمل کو دہشت گرد کارروائی قرار دیا ہے۔ خصوصی اجلاس میں وزیر اعظم کے زیر صدارت ایک حکومتی کمیٹی تشکیل دینے کی منظوری دی گئی تا کہ اس معاملے کی نگرانی کی جا سکے۔ اس کے علاوہ حوثی ملیشیا کے ہاتھوں اغوا کیے گئے طیاروں کے استعمال پر پابندی کا فیصلہ کیا گیا۔ واضح رہے کہ حوثیوں کی کارروائیوں کے باعث حاجیوں کی واپسی کا عمل رک گیا تھا اور یمنی حجاج کرام سعودی عرب میں پھنس گئے تھے۔