اسلام آباد:اسلام آباد میں جماعت اسلامی کے دھرنے اور اس دوران حکومتی کریک ڈاؤن کے بعد وفاقی وزیر اطلاعات نے جماعت اسلامی پر وعدہ خلافی کا الزام عائد کردیا اور ساتھ ہی انہوں نے جماعت اسلامی کو مذاکرات کی بھی پیش کش کردی ہے۔
لیگی رہنما امیر مقام کے ساتھ پریس کانفرنس کرتے ہوئے وفاقی وزیر اطلاعات و نشریات عطا تارڑ نے کہا کہ جماعت اسلامی کے ساتھ لیاقت باغ میں مہنگائی کے خلاف جلسہ کرنے کا معاہدہ ہوا تھا اور طے پایا تھا کہ جلسہ ختم ہونے کے بعد پروگرام ختم ہو جائے گا، تاہم اس وعدہ خلافی کے بعد بھی حکومت بات چیت کے لیے تیار ہے۔
انہوں نے کہا کہ جماعت اسلامی کے ساتھ لیاقت باغ میں جلسے کا معاہدہ تھا تو وفاقی دارالحکومت اسلام آباد کی جانب جماعت اسلامی کی پیش قدمی سمجھ سے بالاتر ہے۔ انہوں نے کہا کہ حکومت جماعت اسلامی کے ساتھ بات چیت کے لیے تیار ہے۔