اسلام آباد:حکومت نے پیٹرولیم مصنوعات کی قیمتوں میں 10.86 روپے فی لیٹر تک کمی کردی۔
وزیراعظم شہباز شریف کی جانب سے پیٹرولیم مصنوعات کی قیمتوں میں کمی کی منظوری دے دی گئی۔ جس کے مطابق ڈیزل کی فی لیٹر قیمت میں 10 روپے 86 پیسے کمی کی گئی ہے جب کہ پیٹرول کی قیمت میں 6 روپے 17 پیسے فی لیٹر کم ہوئے ہیں۔
اسی طرح مٹی کے تیل کی قیمت میں بھی 6 روپے 32 پیسے کی کمی ہوئی ہے جب کہ لائٹ اسپیڈ ڈیزل کی قیمت بھی 5 روپے 72 پیسے فی لیٹر کم کر دی گئی ہے۔
وزیراعظم شہباز شریف کی منظوری کے بعد وزارت خزانہ نے باضابطہ نوٹی فکیشن جاری کردیا ہے۔
نئی قیمتوں کے مطابق ڈیزل 272.77 روپے فی لیٹر ہوگیا جب کہ پیٹرول 269.43، مٹی کا تیل 177.39 جب کہ لائٹ اسپیڈ ڈیزل کی نئی قیمت 160.53 روپے فی لیٹر ہو گئی ہے۔
