غزہ (مانیٹرنگ ڈیسک) اسرائیلی فوج نے دیر البلاح میں الاقصی شہدا اسپتال کے صحن میں بے گھر فلسطینیوں کے خیموں پر اور پھر ایک اسکول میں قائم خیمہ گاہ پر بھی وحشیانہ بمباری کی ہے جس کے نتیجے میں 20 افراد شہید اور 18 زخمی ہوگئے۔ عالمی خبر رساں ادارے کے مطابق الاقصیٰ اسپتال کے خیمہ گاہ میں 3 فلسطینی شہید اور 18 زخمی ہوئے جبکہ اسکول میں قائم پناہ گاہ کیمپ پر بمباری میں 17 فلسطینی شہید ہوئے۔ امدادی کاموں کے دوران شہید اور زخمی ہونے والوں کو قریبی اسپتال منتقل کردیا گیا۔ جہاں 7 زخمیوں کی حالت نازک ہونے کے سبب شہادتوں میں اضافے کا خدشہ ظاہر کیا جا رہا ہے۔ اسرائیل کے 7 اکتوبر سے جاری غزہ پر بمباری میں شہید ہونے والے فلسطینوں کی تعداد 40 ہزار کے قریب پہنچ گئی جبکہ 91 ہزار 200 سے زاید زخمی ہیں۔
