پشاور:تحریک انصاف ( پی ٹی آئی ) رکن قومی اسمبلی اسد قیصر نے کہا ہے کہ حکومت نے فسطائیت کی انتہا کر دی ہے، ایسا مارشل لا لگنے کے بعد بھی نہیں ہوتا، حکومت نے اجازت ملنے کے بعد بھی جلسے کی راہ میں رکاوٹیں کھڑی کرکے راستے بند کردیے ہیں۔
میڈیا سے گفتگو کرتے ہوئے اسد قیصر نے کہا کہ سیکیورٹی کی آڑ میں حکومت نے راولپنڈی اور اسلام آباد کی آبادی کو یرغمال بنایا ہواہے،راستے بند کرنا اور جلسے میں رکاوٹیں ڈالنا عدالتی احکامات کی خلاف ورزی ہے۔
انہوں نے کہا کہ جلسے میں شرکت کے لیے سب پاکستانیوں کو نکلنا ہوگا ، حکومتی ہتھکنڈے لوگوں کو روک نہیں سکتے، انتشار کی سیاست پر یقین نہیں رکھتے۔ یہ ہمارا آئینی حق ہے کہ ہم اپنی آواز عوام تک پہنچائیں۔