وزیراعظم محمد شہباز شریف کے وژن کے تحت ملائیشیا کیلئے گوشت کی برآمدات کے منصوبے کی حتمی منظوری دی گئی ہے۔اس سلسلے میں اسلام آباد میں ایک اعلیٰ سطح کا اجلاس منعقد کیا گیا جس کی صدارت وزیر اعظم کے معاون خصوصی ہارون اختر خان، وفاقی وزیر نیشنل فوڈ سکیورٹی رانا تنویر حسین اور وفاقی وزیر تجارت جام کمال خان نے مشترکہ طور پر کی۔
اجلاس میں ملائیشیا کو گوشت کی برآمد کیلئے حتمی بزنس پلان پیش کیا گیا۔ہارون اختر خان نے ایکسپورٹ بزنس ماڈل کی تیاری میں تمام وزارتوں اور سٹیک ہولڈرز کی مشترکہ کوششوں کو سراہتے ہوئے کہا کہ گوشت کی برآمد کیلئے ایک مؤثر اور جامع بزنس فریم ورک تیار کر لیا گیا ہے۔
ہارون اختر خان نے اعلان کیا کہ حلال گوشت سیکٹر کو صنعت کا درجہ دیا جائے گا، جس سے برآمدات میں اضافہ ہوگا اور ملکی معیشت مضبوط ہوگی۔وفاقی وزیر رانا تنویر حسین نے کہا کہ ملائیشیا کے معیار کے مطابق جدید سلاٹر ہائوسز قائم کئے جائیں گے، جس سے تجارتی استعداد میں اضافہ ہوگا۔
جام کمال خان نے تمام سٹیک ہولڈرز کے مشترکہ تعاون کو اجاگر کرتے ہوئے کہا کہ یہ پیکیج تمام متعلقہ شعبوں کی مشترکہ کوششوں اور اتفاق رائے کا نتیجہ ہے۔وزیراعظم کے وژن کے مطابق ملائیشیا کو گوشت کی برآمدات کا ہدف آئندہ 3 سے 5 سال میں 200 ملین ڈالر مقرر کیا گیا ہے۔
اشتہار 