اسلام آباد: پاکستان تحریک انصاف (پی ٹی ائی) کے رہنما اور چیئرمین بیرسٹر گوہر علی خان نے کہا ہے کہ عوام کے ووٹ سے واپس آئیں گے اور ترامیم کو واپس کریں گے۔
قومی اسمبلی کے اجلاس میں پاکستان تحریک انصاف کے رہنما اور چیئرمین پی ٹی آئی بیرسٹر گوہر نے واضح کیا کہ ان کی جماعت عوام کے ووٹ کی طاقت سے دوبارہ ایوان میں آئے گی اور حالیہ ترامیم کو واپس لینے کے لیے پارلیمانی طریقہ اپنائے گی۔
خطاب کے دوران بیرسٹر گوہر نے یقین دہانی کرائی کہ پی ٹی آئی کبھی پارلیمنٹ پر حملہ نہیں کرے گی اور نہ ہی ایوان کے تقدس کو پامال کرنے کا سوچ سکتی ہے۔
انہوں نے کہا کہ پاکستان تحریک انصاف جمہوری عمل کے تسلسل اور پارلیمانی بالادستی کے لیے اپنا کردار ادا کرتی رہے گی۔
اپوزیشن اور حکومتی اراکین کو مخاطب کرتے ہوئے انہوں نے کہا کہ ایوان میں ایک دوسرے پر الزامات اور چور کہنے کی روایت پہلے بھی رہی ہے، تاہم یہ بات اہم ہے کہ پارلیمنٹ کے وقار کو مجروح نہ کیا جائے۔
اجلاس کے دوران اسپیکر قومی اسمبلی نے ریمارکس دیے کہ ان کی نظر میں محمود خان اچکزئی اپوزیشن لیڈر نہیں ہیں، جس پر بیرسٹر گوہر نے مؤقف اختیار کیا کہ محمود اچکزئی ایوان میں قائدِ حزبِ اختلاف کی حیثیت رکھتے ہیں اور اسی طور پر انہیں تسلیم کیا جانا چاہیے
